Арт кёзюуде Черкесскеде талай джангы социал объект ишленнгенди, эскилени талайыны да тамамлы ремонту битгенди. Байрамны экинчи кюнюнде, шахарны шимал джанындагъы джангы тийреде аллай эки объектни къууанч халда ачыб, хайырланыугъа бердиле.
Аланы бири темир джолну башы бла ишленнген кёпюрдю. Узунлугъу 700 чакълы метр болгъан ол деменгили кёпюр шахарны «Северный» деген тийресин федерал джол бла байларыкъды.
Алайда, джангы шахар тийреде, джангы орам, атына да «200-летие Черкесска», деб къуралгъанды эмда ол ат бла стела салыннганды.
Джангы объектлени къууанч халда ачыугъа аталгъан джыйылыугъа КъЧР-ни Башчысы Темрезланы Рашид, Черкесск шахарны мэри Алексей Баскаев, РФ-ны, КъЧР-ни махтаулу къурулушчусу, Черкесск шахарны сыйлы адамы Озов Анатолий, ол затланы ишлеген къурулушчула, республиканы къонакълары къошулгъандыла.
Джыйылгъан джамагъатны аллында сёлеше, Рашид Бориспиевич эки байрам бла да алгъышлады, республикада джашауда бардырылгъан проектле бары да РФ-ны Президенти Владимир Владимирович Путинни бизге энчи къайгъырыууну, регионланы инфраструктураларыны айнытыугъа уллу эс бёлюуюню себебинден толуб баргъанларын чертди. Аны кибик, бу объектлени къоллары бла этген къурулушчулагъа, инженерлеге, бирси усталагъа да джуртун сюйген, аны айнытыугъа къыйынын къошхан джердешлеге да бюсюреу-сыпас этди. Ара шахарыбызны 200-джыллыгъыны сыйына аталыб къуралгъан орамда, стелада къол ызларын къойгъан ишчилени кючюнден Черкесск ёсюб, къууатлы, айбатлы шахар болгъанды, деди ол.
Ол оюмну айтыб сёлешдиле къууанч митингде Черкесскни мэри Алексей Баскаев, махтаулу къурулушчу Озов Анатолий эмда башхала.
Ёзденланы Якъуб.




