Къыркъаууз (сентябрь) айны 3-де, Терроризмге къаршчы кюрешде бир иннетлиликни кюнюнде, бютеу Эресей бла бирге Къарачай-Черкесия да Бесланда ачыгъанланы эсге тюшюрдю.


Ол кюн власть органланы къуллукъчулары, джамагъат бирлешликлени келечилери, устазла, сохтала дагъыда башха къайгъырыулу джердешлерибиз, Коста Хетагурово элде бардырылгъан бушуу митингге къошулуб, мурдарланы къолларындан ёлгенлени эсге тюшюре, бир такъыйкъаны шош турдула. Джыйылгъанла, анда мемориалгъа гокка хансла салыб, Бесланда адамлары ёлгенле бла бирге бушуу этгенлерин билдирдиле.
Бесланда уа, 2004-чю джыл къыркъаууз (сентябрь) айны 1-де бек ачы иш болгъан эди. Билимни кюнюне джыйылгъан сохталаны, устазланы, аналаны-аталаны, бютеулей да 1128 адамны, террористле, джюкге алыб, 3 кюнню зор бла тыйыб тургъан эдиле. Ол терроризм ишни кёзюуюнде 186 гюнахсыз сабий бла 17 устаз да ичлеринде болуб, 334 адам ёлген эди.
Джюкге алыннган адамланы (заложниклени) къутхарабыз деб да, къоркъуусузлукъну сакълагъан органланы къуллукъчуларын-
дан оноулан аджалына тюбеген эди. Андан бери Бесланда школ азатланнган кюн, къыркъаууз (сентябрь) айны 3-сю, Терроризмге къаршчы кюрешде бир иннетлиликни кюню деб белгиленеди.
Ол терактны кёзюуюнде ёлгенлеге къыйналгъаныны юсюнден Къарачай-Черкесияны Башчысы Темрезланы Рашид МАХ мессенджерде кесини каналында: «2004-чю джылны къыркъаууз (сентябрь) айында джюреклерибизге бителмезлик джарала тюшгендиле. Ол ачы ишни кёзюуюнде джюзле бла гюнахсыз сабийле ёлгендиле. Балаларын школдан къууаныб къайтырларын сакълагъан атала бла анала бушуугъа бёленнгендиле…
Ахыр кюнлерине дери антларына керти джигитлени разылыкъ бла эсгеребиз…
Бу барыбызгъа да къатылгъан иш бизге биригирге, сакъ болургъа кереклисин эсгертгенди, рахат джашауубузну багъалатыргъа юретгенди.
Бесланда болгъан терроризмде ачыгъанланы эсгере, эм багъалы сабийледиле да, аланы рахат джашауларын сакъларгъа, келир заманларын джарыкъ этерге кюрешейик. Не тюрлю къоркъууну да бирикгенибиз бла хорларыкъбыз. Ата джуртубузда бирикмеклик, келишиулюк орналсын!» – деб джазгъанды.
Митингни ахырында анга къошулгъанла, гюнахсыз ёлген сабийлеге, устазлагъа, джюккге алыннган адамланы къутхарабыз деб, кеслерини джанларын берген джигитлеге атаб, кёкге акъ шарла ийигендиле.

 
{jcomments}