Мындан алда Къарачай-Черкесияны Башчысы Темрезланы Рашид Джолда къоркъуусузлукъну бегитиуню хакъындан республикан комиссияны кенгешин бардыргъанды.
Ол кенгешге КъЧР-ни Халкъ Джыйылыууну (Парламентини) Председатели Александр Иванов, регионну Правительствосуну Председатели Мурат Аргунов бла башха къуллукъчулары, джорукъ сакълаучу органланы келечилери, муниципал къуралышланы башчылары, джол мюлк организацияланы тамадалары къошулгъандыла.
Анда РФ-ны Президенти Владимир Путин джол чарпыулада ачыгъанланы санын 2030-чу джылгъа 1,5 кереге, 2036-чы джылгъа да 2 кереге аз этерге борч салгъаны айтылгъанды.
Кенгешни ача, Темрез улу арт кёзюуде бизни регионда машина джоллагъа иги къаралгъанын чертгенди.
Башчы айтхандан, «Деменгили эмда къоркъуусуз джолла» деген миллет проектни тамалында бизни регионда 191 километр джол бла 13 кёпюр джангыртылгъандыла. Къоркъуусузлукъну бегитир мурат бла салыннган камераланы саны да ёсюб барады.
Темрез улу: «Бюгюнлюкде республиканы машина джолларында 108 камера ишлейди. Аууз-герги (октябрь) айны ахырына дери энтда 10 салынныкъды. Былайда, солургъа келген къонакъланы улоулары да къошулуб, джолларыбыз бла хайырланнган машинала да кёбден кёб болуб баргъанларын чертерге тыйыншлыды. Аны ючюн, къоркъуусузлукъну бегитиуге эс бёлгенлей турургъа керекди. Джол чарпыула болдурмаз, бютюн да бек сабийлени джолоучулукъда джарсытмаз, мадарланы хайырландырыугъа, профилактика ишле бардырыугъа аслам эс бёлюрге тыйыншлыды», – дегенди.
Къарачай-Черкесияны Башчысы Темрезланы Рашид кенгешге къошулгъанлагъа кеслери джууаблы ишлени мийик дараджада баджарыргъа, джол чарпыула болмазча къошакъ мадарла къураргъа борч салгъанды.
Башчы Правительствону къуллукъчуларына джангы ишленнген неда джангыртылгъан сабий садланы арбазларында «Автогородок» болургъа джараулу джерчикле къураргъа ачха джораларгъа кереклисин айтханды. Алада сабийле джолда джюрюуюню джорукъларына гитчеликден юренникдиле.




