Быйыл, къыркъаууз (сентябрь) айдан башлаб, ШККъА-да астрофизиканы кафедрасы ачыллыкъды. Бу кафедра цифралы технологияланы институтуну тамалында ишлеб тебрерикди.
Джангы кафедра ишин джетишимли къурар ючюн, академияны башчылыгъы бла САО РАН-ны къуллукъчулары, тюбешиб, бир оноуда тохтагъандыла.
– Кафедрагъа башчылыкъ этерге Эресейни Илмула академиясыны астрофизика обсерваториясыны директору Геннадий Геннадиевич Валявинни теджегенбиз. Былайда кимле ишлериклерини, къаллай окъуу китабла бла хайырланыргъа тыйыншлысыны юсюнден да сёлешгенбиз. Бизни студентлерибизге академияны устазлары бла САО РАН-ны къуллукъчулары дерс берликдиле. Оннга джууукъ билимли адам лекцияла окъурукъду, физикадан, астрономиядан джаш адамла бла сынам ишле бардырыллыкъдыла. Аны бла бирге астрономияны джангы информацион системалары бла шагъырей этерикдиле, – дегенди ШККъА-ны ректору Къочхарланы Руслан.
Ол айтханнга кёре, бу кафедра обсерваториягъа инженерлени, тинтиу иш бла кюреширик усталаны хазырларыкъды, студентлеге илму эмда цифралы технология джаны бла терен билим берликди.




