Къарачай-Черкесияны устазлары, Черкесск шахарны мэриясына джыйылыб, «Основные векторы системы образования на 2025 – 2026 учебный год» деген темагъа кенгешдиле.
Билим бериу санагъатны усталарыны кенгешлерине Къарачай-Черкесияны Правительствосуну Председатели Мурат Аргунов, баш федерал инспектор Тимур Макоев, Къарачай-Черкесияны Правительствосуну Председателини орунбасары Евгений Поляков, КъЧР-ни билим бериу бла илмуну хакъындан министри Инна Кравченко, Черкесск шахарны мэри Алексей Баскаев дагъыда башхала къошулдула.
Эресей Федерацияны билим бериуню хакъындан министри Сергей Кравцов, видео байламлылыкъны кючю бла джыйылыугъа къошулуб, устазлагъа хошкелди айта, аланы кърал дараджада джангы окъуу джылгъа белгиленнген ишледен хапарлы этди.
Республиканы Премьер-министри Мурат Аргунов да Къарачай-Черкесияны Башчысы Темрезланы Рашидни атындан джангы окъуу джыл башлана тургъаны бла устазланы алгъышлады.
«Билим бериуню ёсдюрюу РФ-ны Президенти Владимир Путин салгъан баш борчларыбызны бириди. Къарачай-Черкесияны Башчысы Темрезланы Рашид да республикабызны, къралыбызны келир заманы джаш тёлюбюзге берген билимибизге кёре боллугъун чертгенлей турады», – деди ол.
Мурат Аргунов, Къарачай-Черкесия да къошулуб, бютеу Эресейде билим берген заманда айырыб эс бёлюрге керекли ишлени юслеринден да айтды.
Аланы арасында 2036-чы джылгъа дери РФ-да билим бериуню дараджасын кёлтюрюуге аталгъан стратегияны толтуруу, быйыл Уллу Хорламны 80-джыллыгъы белгиленнгени, Ата джуртну джакъчысыны джылы деб баямланнганы бла байламлы ёсюб келген тёлюню патриотлукъгъа юретиуге, сабийлени саулукъларын бегитиуге, аланы фахмуларын ачыкълаугъа аталгъан ишлеге уллу магъана берилгенин чертди.
Правительствону Председатели сабийле таб болумда окъур ючюн, республикада кёб иш этилгенин да сагъынды.
Мурат Аргунов, устазлагъа саулукъ-эсенлик, таркъаймазлыкъ учунмакълыкъ, уллу тёзюм теджей, ала борчларын мийик дараджада толтурлукъларына ышаннганын чертди.
Ызы бла бусагъатха дери джууаблы ишлерин деменгили баджаргъан устазланы бир къауумун КъЧР-ни Правительстосуну Хурмет къагъытлары бла саугъалады.
Башха кърал къуллукъчула да Премьер-министрни алгъышлаууна къошулдула.
КъЧР-ни окъуу бла илмуну хакъындан министри Инна Кравченко, озгъан окъуу джылны иги эсеблерин юлгюге келтире, мындан ары эс бёлюрге керекли ишлени юслеринден айтды. Ол да махтаулу устазлагъа кърал эмда ведомство саугъала берди.
Алайгъа джыйылгъанла СВО-ну ветеранына, кёб болмай «Абилимпикс» эришиуледе хорламлы болуб келген Биджиланы Шамилге уллу сый бердиле.
Джыйылыуда КъЧР-ни окъуу бла илму министрини заместителлери Бекижева Фатима, Заира Карасова, билим бериу санагъатны регионал профсоюзуну тамадасы Чотчаланы Марина, гитче классланы устазларын хазырлагъан У. Хабеков атлы колледжни директору Николай Рыжов, «Навигаторы детства» деген проектни регионал координатору Борлакъланы Людмила, «Знание» деген эресейчи джамагъат бирлешликни КъЧР-де бёлюмюню директору Болатланы Артур да сёлешдиле. Аланы хар бири да билим бериуню игилендирирге джарарыкъ оюмларын айтдыла.




