Джылы келген тиширыуну алдаб, хыйлачыла 2,3 мелиуан сомну иелегендиле.

Эресейни МВД-ны Черкесск шахарда бёлюмюне Нарсанада джашагъан 80 джыл болгъан тиширыу тарыгъа баргъанды.
Амма айтхандан, элия (июль) айны 31-ден бери биреуленле, анга мессенджерле бла сёлешиб, кеслерин ФСБ-ны, Росфиннадзорну къуллукъчуларыча танытхандыла.
Ала, тюрлю-тюрлю ётюрюкле айтыб, пенсионер тиширыуну рысхысы башха адамгъа джазылгъанына, аны аты бла Украинаны адамы кредит алгъанына ийнадыргъандыла. Аны ючюн, джууабха тартылыргъа боллукъса деб, аманлыкъчыла амманы къоркъутхандыла.
«ФСБ бла Росфиннадзорну къуллукъчуларындан» башын алыр ючюн, амма 2300000 сомну ала айтхан счётлагъа ашыргъанды.
Бусагъатда полицияны къуллукъчулары, РФ-ны Терслеу кодексини 159-чу статьясыны 4-чю бёлюмюне кёре терслеу иш ачыб, бу хыйлалыкъ къалай этилгенин ачыкъларгъа кюрешедиле.
Багъалы, сыйлы джамагъат! Джорукъ сакълаучу органланы къуллукъчулары телефон бла не оператив, не тинтиу ишле бардырмагъанларын хар адам да билирге керекди.
Мен анда-мында ишлейме деб, сёлешген болса, аны атын, атасыны атын, тукъумун, къуллугъун соруб, айтхан организациясына къонгурау къагъыб, керти да анда аллай адам ишлегени бла къалгъанын билирге да боллукъду.

КъЧР-ни МВД-ны пресс-къуллугъу.

 
{jcomments}