Бу кюнледе Къарачай-Черкесияны Премьер-министри Мурат Аргунов РФ-ны Вице-премьери Дмитрий Чернышенкону башчылыгъы бла 2025-чи – 2026-чы окъуу джылгъа хазырланыугъа аталгъан кенгешге къошулгъанды.
Кенгешге къошулгъанла къыркъаууз (сентябрь) айны 1-де сохталаны окъутуб башларгъа школланы хазырлыкъларын сюзгендиле.
Видеоконференция халда бардырылгъан кенгешде билим бериуге эмда сохталагъа таблыкъла къураугъа джууаблы федерал министерстволаны, ведомстволаны тамадалары бла регионланы келечилерине сёз берилгенди.
Анда Мурат Аргунов Къарачай-Черкесияны 327 кърал эмда муниципал окъуу учреждениси окъуу джылгъа хазыр болгъаныны юсюнден хапар айтханды.
Ол чертгенден, бизни республиканы школлары да, сабий садлары да джууукълашыб келген окъуу джылгъа хазырдыла. Ууакъ-тюек джумушла этилирге керекдиле да, ала да дерсле башланнгынчы баджарыллыкъдыла.
Кенгешде окъуу учреждениелени отдан, терроризмден къоркъуусузлукъларын бегитиуню, санитар-эпидемиология излемлени сакълауну юсюнден да сёлешиннгенди.




