Къарачай-Черкес Республиканы районлары бла шахарларында бардырылгъан «Мак-2025» деген профилактика операцияны тамалында полицияны къуллукъчулары бла муниципалитетлени келечилери, биригиб, кийик ёсген кендирни табыб, аны къурутур мадарла этедиле.

«Наркотиклени джорукъсуз джюрютгенлени эмда кийик кендир ёсген джерлени билген адамла ышаныу телефон бла неда ич ишлени органларыны бёлюмлерине билдирирлерин тилейбиз. Джамагъат бла полиция биригиб ишлеселе, кёб ашхы джумуш этилликди. Регионда адамланы саулукълары, къоркъуусузлукълары сакъланныкъды», – дегендиле КъЧР-ни МВД-ны пресс-къуллугъунда.
Черкесскеде полицияны къуллукъчулары бла мэрияны келечилери биригиб бардыргъан ишни кёзюуюнде кийик ёсген кендирле болгъан джерле ачыкъланнгандыла. Степной орамда 250 квадрат метр джерде 500 кёкен, Къобан сууну джагъасында 50 метр квадрат джерде 56 кёкен, шахарны къыбыла джанында 65 кёкен кендир къурутулгъанды. Шахарда бютеулей 621 кендир кёкен джокъ этилгенди.
Аллай ишле Къарачай шахарда да бардырылгъандыла. Орджоникидзе посёлокну тёгерегинде МВД-ны «Карачаевский» бёлюмюню къуллукъчулары 0,5 гектар джерде ёсген 2500 кендир кёкенни чалгъандыла. Ол 390 килограмм болгъанды. Полиция бла джамагъатны келечилери аны джандырыб къурутхандыла.
Джёгетей Аягъы шахарда да полицияны участоклагъа къарагъан къуллукъчулары джергили администрацияны келечилери бла бирге, 5 сотух джерден кийик ёсген кендирни чалыб, джыйыб джокъ этгендиле.
Аллай ишле Адыге-Хабль районда да бардырылгъандыла. Садовый элде 40 квадрат метр джерде къалын ёсген кендирни чалыб, джандыргъандыла.
КъЧР-ни МВД-ны Зеленчук районда тас болгъан затланы кеслерин табдырмагъан адамланы излеу бла кюрешген бёлюмюню къуллукъчулары Курджиново элде, джашагъан 54 джыл болгъан биреуню бачхасында ёсюб тургъан кендирни кёргендиле. Алайда 27 кёкен болгъанды. Эркиши алагъа башха ёсюмлюкле бла бирге къараб, чага этиб, суу къуюб ёсдюргенди. Ол, кендирни кеси энчи хайырландырыргъа деб ёсдюргенин айтханды. Кендирлени барын да сыйырыб экспертизагъа ийгендиле. Экспертиза айтханнга кёре бегим алынныкъды.
Наркотиклени джорукъсуз джюрютгенлени билгенле бу телефон номерле бла хапар берирге боллукъдула: КъЧР-ни МВД-сы: 8 (8782) 29-22-05, УНК: 8(8782) 26-58-80, МВД-ны дежурный бёлюмю: 8(87875) 7-49-70 неда 02 (мобильныйден – 102).

(Бизни корр.).

 
{jcomments}