Къарачай шахарны ара паркын джангыртыу бла байламлы проект «Лучшие проекты создания комфортной городской среды» деген X-чу бютеу Эресейде бардырылгъан конкурсда хорлагъанды.
Конкурсну эсеблери Къазан шахарда «Развитие малых городов и исторических поселений» деген форумну пленар кенгешинде чыгъарылгъандыла. Анга РФ-ны Правительствосуну Председатели Михаил Мишустин, РФ-ны Правительствосуну Председателини орунбасары Марат Хуснуллин, РФ-ны къурулуш бла ЖКХ министри Ирек Файзуллин къошулгъандыла.
«Инфраструктура для жизни» деген миллет проектни тамалында келир джыл «Красота вокруг нас» проект толтурулуб башланныкъды – Къарачай шахарны ара паркы айбат тюрсюн аллыкъды. Алай бла, паркда адамла джаяу джюрюрча джер, шахарны картасы салыннган майдан, сабий эмда спорт майданла, джайгъы кинотеатр, кафе, табигъат байлыкъ, къол аяздача, ариу кёрюннген къараучу джер, нарат тереклени арасында солурча джерле джарашдырыллыкъдыла.
Къарачай шахар быллай конкурсда экинчи кере хорлайды. 2021-чи джыл, республикада биринчи болуб, шахар «Джашил айрымкан» паркны джарашдырыугъа аталгъан проекти бла алчы оруннга чыкъгъан эди.
(БИЗНИ КОРР.).




