Къыркъар (август) айны 21-де, 22-де Архызда «Мой Бизнес.Лагерь» деген форум бардырылгъанды.

Кърал дараджалы форумну Къарачай-Черкесияда бардырыу ашхы адет болгъанды. Быйыл ол бизни республикада ючюнчю кере ётгенди. Анга Эресейни регионларындан 200 эксперт къошулгъанды – власть органла, табышлылыкъ иш бла кюрешгенле, алагъа болушлукъ этгенле.
Форум РФ-ны Экономика ёсюмюню министерствосуну болушлугъу бла къуралгъанды.
«Мой Бизнес.Лагерь» деген форумну пленар кенгеши да болгъанды. Анда сёз гитче эмда орта табышлылыкъны айнытыуну юсюнден баргъанды. Кенгешге РФ-ны экономика ёсюмюню министрини орунбасары Татьяна Илюшникова, КъЧР-ни экономика ёсюмюню министри Артур Езаов, «Креатех» аралыкъны директору Александр Гофман, Москваны Табышлылыкъ бла инновация ёсюмюню хакъындан департаментини тамадасыны орунбасары Александр Дерюгин, «Ozon» проектни вице-президенти Мария Заикина, Цифра маркировканы кърал системасыны баш директоруну орунбасары Сергей Холкин дагъыда башхала къошулгъандыла.
«Эресейни Президенти Владимир Путин салгъан борчха кёре, 2030-чу джылгъа дери гитче эмда орта табышлылыкъ санагъатда уруннган хар бир ишчини хайыры ВВП-ны ёсюмюнден 20 процентге дери аслам болургъа керекди. Алай болур ючюн, табышлылыкъ бла кюрешгенлеге болушлукъ этиуде эки затха эс бёлюрге тыйыншлыды. Биринчиси, экономикагъа магъанасы уллу болгъан компаниялагъа эс бёлюрге керекди. Экинчиси, СВО-гъа къошулгъанла, тиширыула, джаш тёлю, уллайгъанла кирген социал къауумлагъа болушлукъ этиу баш орунну алгъанын эсгерирге керекди. Быйыл гитче эмда орта табышлылыкъгъа болушлукъ этиуге РФ-ны Правительствосу «Мой бизнес» деген аралыкъланы юслери бла 1 миллиард сомну юлешгенди», – дегенди РФ-ны экономика ёсюмюню министрини орунбасары Татьяна Илюшникова.
Къарачай-Черкесияда гитче эмда орта табышлылыкъ бла кюрешген 13 800 компания эсебге тюшюрюлгенди. Алада 49 800 адам урунады. «Малое и среднее предпринимательство» деген миллет проект толтурулгъан кёзюуде республиканы бюджетине 2,5 кереге аслам налог тюшгенди. Аны бла бирге Къарачай-Черкесияда табышлылыкъ бла кюрешгенле, пандемияны заманында да, аскер къаугъа башланнганлы да гуманитар болушлукъ этиб, социал джууаблылыкъларын танытадыла.
Федерал, регионал дараджада да бизнесге болушлукъ мадарла къуралгъандыла. Сёз ючюн, миллет проект толтурулгъан кёзюуде табышлылыкъ бла кюрешгенлеге 700 мелиуан сом багъасы 255 займ берилгенди. Аны себебинден 400-ден аслам иш орун къуралгъанды.
Ачха болушлукъдан сора да регионда «Мой бизнес» деген аралыкъ ишлейди. 2019-чу – 2024-чю джыллада 5,3 мингден аслам адам аралыкъны юсю бла 13 мингнге джууукъ ишин тындыргъанды.
«Кърал болушлукъ этилгенини себебинден, Къарачай-Черкесияда гитче эмда орта табышлылыкъны дараджасы 30 процентге ёсюб, иги кёргюзюмлеге джетгенди. Бюгюнлюкде Къарачай-Черкесияда гитче эмда орта табышлылыкъ республиканы экономикасыны 30 процентин алады. Арт алты джылны ичинде аны дараджасы 19 процентден 25 процентге ёсгенди. Табышлылыкъ бла кюрешгенлеге болушлукъ этиу баш орунну алады. Нек десегиз, джангы иш орунла къураладыла, джамагъатны джашау болуму игиленеди, регионну экономикасы ёсюм алады», – дегенди КъЧР-ни экономика ёсюмюню министри Артур Езаов.
Цифра маркировканы кърал системасыны баш директоруну орунбасары Сергей Холкин «Честный знак» деген маркировка система табышлылыкъ бла кюрешгенлеге къалай болушханыны юсюнден хапар айтханды.
«Бизни баш муратыбыз маркировканы хайырландырыб, ол бизнесни тюз бардырыргъа мадар берирча этиудю. Регионлада маркировка этиу аралыкъла къурагъаныбыз да аны ючюндю. Аралыкълада табышлылыкъ бла кюрешгенле хакъсыз болушлукъ табадыла. Ол бары да регионланы экономикаларына ёсюм алдырыр хыйсаб береди», – дегенди ол.
Айтыргъа, форум бардырылгъан эки кюнню ичинде къралыбызны тюрлю-тюрлю регионларындан келген устала гитче эмда орта табышлылыкъ бла кюрешгенлеге болушлукъ этиуде, аны кибик башха ишледе да сынамлары бла алмашхандыла.

Салпагъарланы Умар.

 
{jcomments}