Джыл сайын тюрлю-тюрлю санагъатланы келечилеринден къуралгъан комиссия, школлагъа айланыб, аланы джангы окъуу джылгъа хазырлыкъларына къарайды.
Алайды да, комиссия быйыл да школланы, сабий садланы, къошакъ билим берген учреждениелени хазырлыкъларына тюз багъа бергенин чертерге тыйыншлыды.
Сёз ючюн, комиссия КъЧР-де 327 окъуу-билим берген организацияда болумгъа къарагъанды: 158 школгъа, 134 школгъа дери организациягъа, 22 къошакъ билим берген эмда 9 орта усталыкъ билим берген учреждениеге.
Аны бла бирге комиссия 400-ден аслам мекямны, 4000-ге джууукъ окъуу кабинетни, 152 спорт залны, 300-ге джууукъ хант юйню, 46 буфетни, 275 медицина кабинетни болумун тинтгенди. 165 автоном котельнягъа да къарагъанды. Комиссия, алагъа талай джолда барыб, кемликлерин тюзетдириб, окъуу джылгъа хазыр болургъа себеблик этгенди.
Ала барысы да комиссиядан ётгендиле, алай эсе уа, джангы окъуу джылгъа тюберге толу хазырдыла.
– Комиссияны членлерини барысына да разылыгъыбызны билдиребиз. Окъуу-билим берген учреждениелени мекямларындан башлаб, кабинетлерине, спорт залларына дери тинтиб къарагъандыла. Кёзюу-кёзюую бла ачыкълагъан кемликлерин тюзетдириб тургъандыла. Энди ала сохталагъа эшиклерин кенг ачхандыла. Алада сабийле терен билим алырча болум къуралгъанды, – деб билдиргендиле КъЧР-ни Окъуу бла илму министерствосунда.




