Белгилисича, Къарачай-Черкесия Луганск Халкъ Республиканы Старобельск районуна болушлукъ этерге бойнуна борч алгъанды. Аны бла байламлы джыл сайын андан келген сабийле джай кёзюуде бизде зауукълу солуйдула, социал объектлени къурулушларына эмда алагъа ремонт этиуге да регион юлюшюн къошханлай турады.

Джангы окъуу джылны аллы бла КъЧР-ни Башчысы Темрезланы Рашидни аманатын толтура, Старобельск районну сохталарына 360 рюкзак ашырылгъанды.
Хар рюкзакны ичинде сохталагъа керекли затла бардыла – аланы кючлери бла сабийле школгъа барсала, джукъ керекли болмай, окъуб тебрерикдиле, деген уллу джангыллыкъ тюлдю.
Рюкзакла биринчи классха барлыкълагъа багъышланнгандыла – дефтерлеге, къаламлагъа, карандашлагъа, къыптылагъа дагъыда башха затлагъа, айхай да, ала бек къууанныкъдыла.
Алайды, школну босагъасындан джангы атлагъанла омакъ рюкзаклагъа ие болгъан бла бирге, алагъа эм бек керекли затла бла да «сауутланнгандыла». Энди ала школгъа таукел атланырча болгъандыла.
– Сабийлени школгъа хазырлау уллу джумушланы бириди. Ала джангы рюкзакълагъа, аланы ичлеринде болгъан керекли затлагъа да къууаннганларына ишек джокъду. Эресейни регионларыны арасында байламлылыкъгъа быллай ишле джол бередиле, къайгъырыуну сезгенлени джюреклеринде уллу къралларына разылыкъ бла бирге ёхтемлик сезимле да джаратыладыла. Сабийле къалайда да асыулу билим алыргъа керекдиле, – деб чертгендиле КъЧР-ни Окъуу бла илму министерствосунда.

 
{jcomments}