Къарачай-Черкесиягъа Беларусь Республикадан солур иннет бла сабийле къонакъгъа келгендиле. Ол зат эки къралны арасында къарнашлыкъны, шохлукъну бегитирге джораланнганды.

Бу ашхы иш Эресей Федерацияда Ата джуртну къоруулаучуну джылында этилгенди, алай эсе уа, ёсюб келген джаш адамланы джюреклеринде патриот сезимлени къозгъалгъанларына ишек да джокъду.
Быйыл къыркъар (август) айны 14-де Белоруссиядан келген 20 сохтагъа Доммайны «Грант Виктория» саулукъ сакълау лагеринде бек джарыкъ тюбегендиле.
Къонакъ сабийлени республиканы белгили эмда тарих бла байламлы джерлерине айландыргъандыла. Айтыргъа, ала Теберди миллет паркда, Эресейни Джигити Боташланы Къанаматны Къарачай шахарда эсгертмесинде, Кавказ ауушланы къоруулагъанлагъа аталгъан мемориал комплексде, Черкесскеде Махтауну аллеясы бла Хорламны паркында болгъандыла.
Бу проектге джашау берир ючюн, КъЧР-ни Башчысы Темрезланы Рашид уллу юлюш къошханды. Белоруссиядан келген сабийле къыркъар айны 21-де джуртларына къайтырыкъдыла.
Кёб турмай Къарачай-Черкесиядан да 20 сабий Беларусь Республикагъа къонакъгъа барлыгъын билдиргенди КъЧР-ни Башчысы Темрез улу. Ол затны эки республиканы эмда уллу Эресейни халкъларын бирикдириуде магъанасы уллу болгъанын чертгенди регионну Башчысы.

 
{jcomments}