Мындан алда Къарачай-Черкес Республиканы Джамагъат палатасында «тёгерек стол» болду. Ол уллу къауумгъа диспансеризация этиуге, сабий къурарча джыллада тиширыула бла эркишилени саулукъларына багъа бериуге аталгъан эди.
Бу ишге тиширыуланы, эркишилени саулукълары бла байламлы профилактика ишле бардыргъан устала, экспертле джыйылгъан эдиле.
Аланы ичинде кёб тюрлю организация бла учреждениени келечиси бар эди: «Клиника доктора Байкуловой» деген учреждениени, Юйдеги къурауну аралыгъыны, Эресейни Тиширыуларны союзуну Къарачай-Черкесияда бёлюмюню, Саулай Эресейде Халкъ фронтну регионал бёлюмюню исполкомуну тамадалары бар эдиле. Аладан сора да республиканы Саулукъ сакълау министерствосуну штатдан тышында акушер-гинекологу да келген эди. Къарачай-Черкесияны Джамагъат палатасыны къуллукъчулары да бу ишни сюзюуге тири къошулгъан эдиле.
«Тиширыуну саулугъу толусу бла иги болуб турса, ол бютеу юйдегини, миллетни да саулугъуну тамалыды. Ол асыулу джашау бла, сабий туууу бла къысха байламлыды. Андан сора да регионну социал-экономика ёсюмюне да энчи юлюш къошады», – деб чертди Карачай-Черкесияны Джамагъат палатасыны тамадасы Елена Ляшова.
Эркишини саулугъуна да къарагъанлай турургъа кереклиси, аны да терен магъанасы болгъаны да сюзюлдю. «Тёгерек столгъа» джыйылгъанла эркишиле саулукъларына заманында къаратыб, медицина тинтиуле тыйыншлысыча этдирилмегенлерине эс бёлдюле. Ол джаны бла да джарсыула кёб болгъанын, ала ёсюб келген тёлюню саулугъуна заран джетдирирге боллукъларыны юсюнден да сёлешинди. Аны ючюн, аланы диспансеризациягъа, профилактика ишлеге тири къошар джанына терен эс бёлюрге кереклисини юсюнден айтдыла. Ол заманда регионда саулукъ сакълауну дараджасы ёсериги чертилди.
Джыйылгъанла аллай ишлени хайыр келтирген магъаналары уллу болгъанын айтыб, ала миллет проектни тамалында баш ишлени бири болургъа кереклисин билдирдиле.
Андан сора, адамланы джашауларын игилендирген бла, узакъ ёмюрлю къалай этерге боллугъун сюздюле. Тиширыуланы саулукъларын тинтгенлей, бакъгъанлай, иги болуб турурча мадарла къурагъанлай турургъа кереклисин да айтдыла. Бу джаны бла сылтаулу тиширыуланы джакълай, власть, органла джашаугъа хайыр келтирлик джангы программаланы киргизирге тыйыншлы болгъанын чертдиле. Ол ишни юсюнде энчи медицина учреждениеледен да тыйыншлы хайыр боллугъун билдириб, кърал эмда медицина учреждениелени бир-бири бла байламлы ишлеселе, адамлагъа таб болуб, алагъа кеслерине тынч къаратырча мадарла къураллыкъларын да айтдыла.
Узеирланы Хусеин.




