Шимал Кавказ кърал академияны студентлери аскер къаугъада джаралы болгъан аскерчилеге болушлукъ этген Дондагъы Ростов шахарда орналгъан аскер госпиталгъа 50-чи кере кетгендиле. Академия ол ишни аскер къаугъа башланнганлы бери бардырады.
Абадан курсланы студентлери госпиталда медицина къуллукъчулагъа джаралы аскерчилени багъаргъа болушадыла, медикле берген джумушланы баджарадыла.
«Бу джол бизни студентлерибиз Дондагъы Ростовгъа 50-чи кере атланнгандыла. Академиягъа ол бош кёргюзюм болуб къалмай, халал джюреклиликни, джууаблылыкъны тарихиди. Студентле ары кеси разылыкълары бла барадыла. Ала бир кёзюуге дери окъууларын къоюб, аскерчилерибизге къайгъырыуларын танытадыла. Айтыргъа, «Медицинский спецназ» деген къауум къуралгъанлы бери анга къошулургъа излегенлени саны ёсюб барады», – дегенди Шимал Кавказ кърал академияны ректору Къочхарланы Руслан.
Студентле джолгъа чыгъарны аллы бла Къочхарланы Руслан бла тюбешгендиле. Ректор алагъа ишлеринде джетишимле теджегенди, сау-эсен барыб къайтыгъыз деб, ашыргъанды. Аны бла бирге Къочхар улу медицина къуллукъну полковниги, госпиталны баш врачы Валерий Кокоевге эмда медицина къуллукъчуланы барына да, байламлылыкъ тутханлары, академияны студентлерине ышанмакълыкълары ючюн, разылыгъын билдиргенди.




