Россельхозбанк Шимал Кавказ кърал академия бла бирге, Эресей Федерацияны Эл мюлк министерствосу, республиканы Правительствосу бла АККОР эмда регионну уллу эл мюлклери кёлтюргючлюк этиб, «Школа фермера» деген окъуу проектни тамалында энтда бир къауум джаш адамны билимин ёсдюрюб башлагъандыла.
Ол Эресейни эл мюлк секторун джакъларгъа эмда ёсдюрюрге джораланады. Бу проект эл мюлкде ишлеб тургъанлагъа, джангы ишлей башлагъан фермерлеге болушургъа, аланы усталыкъларын ёсдюрюрге, заманны излемине келишген агротехнологияланы хайырландырыргъа юретирге, ишлерин файдалы бардырыргъа деб къуралгъанды.
Бу джол «Школа фермера» деген проектни юсю бла, эл мюлк санагъатда билимлерин ёсдюрюрге 30 адам джыйылгъанды. Ала «Атчылыкъ», «Бачхачылыкъ» джанындан хар неге юренирикдиле. Атлагъа къалай къараргъа кереклисине юретиу дерсле бизни республикада биринчи кере бардырыладыла.
Окъуу программа 3 айгъа созуллукъду. Билим берген курсла, мастер-классла офлайн, онлайн халда да къураллыкъдыла.
Уллу эл мюлк предприятиеледе практика семинарла бардырыллыкъдыла. Агротехнологияладан, ачха бла баджарыудан эмда маркетингден экспертле консультацияла берликдиле. Билимлерин ёсдюрюрге излеген усталагъа информацион джаны бла белгили фермерле теджеген оюмладан хапарлы болурча мадарла къураллыкъдыла.
Шимал Кавказ кърал академияны ректору Къочхарланы Руслан аны юсюнден: «Билим алыу аграр санагъатны ёсюмюню тамалыды. «Школа фермера» деген проект джашауда орун алыб баргъанына биз къууанабыз, аны бла ёхтемленебиз. Ол бизни ВУЗ-да да тири джюрюш алгъанды. Баш окъуу заведениени профессор-устаз къурамы, эл мюлкню ёсюмюне уллу юлюш къошуб, къралыбызны сатыу-алыу къоркъуусузлугъун сакъларча керти устала хазырларгъа болушадыла», – дегенди.
Школгъа джюрюгенле, окъууларын тыйыншлысыча бошаб, джараулу бизнес-планла хазырласала, усталыкъларын ёсдюргенлерин кёргюзген документлерин алгъандан сора да, кеслерини энчи ишлерин ачаргъа РСХБ-ны иш нёгерлеринден грант халда болушлукъ табаргъа боллукъдула.
«Джангы башлагъан эмда ишлеб тургъан фермерлени джакълау, аланы ёсюмлерине болушуу Россельхозбанкны баш муратларыны бириди. Аны ючюн биз продукция чыгъаргъанлагъа ачха бергенден сора да, аланы окъутхан этебиз. «Школа фермера» деген проект ол затха юлгюдю. Ол бизни регионда 5 джыл ишлейди», – дейди Россельхозбанкны Ставрополь бёлюмюню директору Алексей Сенокосов.
Бу ишни юсюнден Къарачай-Черкес Республиканы Башчысы Темрезланы Рашид: «Къайсы бир ишни да алгъа бардыргъан усталадыла. АПК санагъатда джангы технологияланы, инновацияланы производствогъа киргизирча, бу джаны бла бирча ёсюм алдырырча уста адамла регионнга керекдиле», – дегенди.
«Школа фермера» деген проект конкурентлик джюрютюр хыйсаблары болгъан устала хазырлаб, аланы хар бири да агропромышленность комплексни ёсюмюне энчи юлюш къошарча, алай бла, регионну экономикасын айнытырча мадар береди», – дегенди республиканы эл мюлк министри Биджиланы Умар да.
Ол Эл мюлк министерство Россельхозбанк бла бирге, льгота программаланы хайырландыра, джангы башлагъан аграрийлени джакъларгъа хазыр болгъанын чертгенди.
Узеирланы Хусей.




