Бу кюнледе Санкт-Петербургда «Учитель года России – 2025» деген саулай Эресейде бардырылгъан конкурсну ахыр кёзюую башланнганды. Анда уллу къралыбызны регионларындан устазланы эм баш саугъалары ючюн, 89 устаз фахмуларын, билимлерин, бютеу кючлерин аямай кюреширикдиле.
Къарачай-Черкес Республикадан ол конкурсха регионал дараджада хорлагъан Къарачай шахарны 1-чи номерли школуну математикадан устазы Сабина Амировна Ханфенова барлыкъды.
Ол конкурсха къошулгъанла биринчи турда «Урок» и «Педагогическое интервью» деген темаладан кеслерини усталыкъларын, танытырыкъдыла. Къыркъаууз (сентябрь) айны 27-де аланы ахыр эсеблеринден 20 лауреат белгиленникди. Ала андан ары ишлерин Москва тёгерекде бардырлыкъдыла.
Хорлагъанны атын аууз-герги (октябрь) айны 3-де Кремлде айтырыкъдыла.
Узеирланы Хусей.




