Быйыл КъЧР-ни ара шахары «туугъанлы» 200 джыл толады. Анга не къадар къууанч халда тюбер иннет бла, Черкесскени, къалгъан джерлеринча, джолларын джарашдырыу бла байламлы кёб иш этилгенди.
Былайда бютеулей да узунлугъу алты километрге джууукъ болгъан сегиз джол кесекге энтда ремонт этилликди. Бусагъатда шахарны онбир орамыны адамла джаяу джюрюген джолчукъларына асфальтобетон салына турады – бютеулей да онюч километрге.
Бюгюнлюкде Октябрьская орамда – Кавказская орамдан «Ветерок» тёгерекге дери – эки километр джолну къызыу джарашдыра турадыла. Шахарны ортасында – Алийланы Умар атлы орамда – джолну ремонту тамамланнганды. Энчи юйле болгъан джерде джол да джарашдырылыб бошайды. Аллыбызда ыйыкъда джолчула Космонавтла, Комсомольская эмда Тверская орамлада джолланы къайгъысын этиб тебрерикдиле.
– Шахарны ариудан ариу болуб баргъанын ким да сезе болур. Арт алты джылны ичине Черкесскеде 80 километр джол тамамлы джарашдырылгъанды, – деб чертгенди Темрез улу.




