Къарачай-Черкесияда маданият объектлени джангыртыугъа кереклисича эс бёлюнеди. Бютюн да тарих магъаналы мекямланы джарашдырыугъа айырылыб магъана бериледи.

Аланы бириди Байчораланы Мариям атлы кърал тарих-маданият эмда табигъат музейни-заповедникни кёрмючле бардырыучу павильону. Аны ачылгъан кюню ол заманда регионну маданият джашауунда керти уллу байрамча да ётгенди.
Бу мекям 1904-чю джыл ишленнгенди, кетген ёмюрню 90-чы джылларында аны джангыдан джарашдыргъандыла. Уллу Хорламны 80-джыллыгъы бла байламлы анга быйыл тамамлы ремонт этиле турады, ишни асламысы тындырылгъанды.
Ол «Юйдеги» миллет проектни «Регионал эмда муниципал музейлени джарашдырыу» деген подпрограммасына кёре джангыртыла турады.
Аны юч залында Уллу Ата джурт къазауатха, бюгюннгю аскер къаугъагъа эмда Афган урушха аталгъан экспозицияла орунлашырыкъдыла. Павильонну бирси джанында алгъынча таймаздан ишлеген экспозицияла турлукъдула: «Миллетлени юйю» эмда «Къарачай-Черкес Республиканы башхалагъа ушамагъан маданият хазнасы».
Айтыргъа, былайда ишни 80 процентинден къол айыргъандыла. Джайны аягъына павильонну джарашдырыб бошарыкъдыла. Андан сора экспозицияланы орунларына салыб тебрерикдиле. Алайды, кёрмючлени павильону кёб турмай эшиклерин ачарыкъды.

 
{jcomments}