Адетдеча, быйыл да Гум Башы ауушда чалкъычыланы эришиулери болду.
Джыл сайын да бу иш уллу байрам халда ётеди. Ол себебден, «эркишини эрлигин» кёргюзген бу ауур джумушха республикабыздан, таб андан тышындан да кёб адам къошулады. Бюгюнлюкде да джаш адамла, хыршыны-эгеуню хайырландыра, таблай-эгей, джаныу эте билгенлерине, гылдыуайны тюз тута билгенлерине, айтыргъа, аталаны усталыкъларын унутмай, «байракъ» этиб элтгенлерине къууанырчады. Джигерлени арасында эм джигерле белгили болдула. 1-чи орунну Тёбен Тебердиден Чомаланы Мурат, 2-чи орунну Огъары Марадан Хачирланы Аслан, 3-чю орунну Учкуландан Борлакъланы Хызыр алдыла. Бу эришиулени къурагъанла, джылладача, Къарайчай район бла Къарачай шахарны администрациялары болдула. Хорламлы болгъанланы да саугъаладыла. Джыйылгъан джамагъат эришиулеге, джыргъа, тепсеуге да къарай, заманны зауукълу ашырды. Чалкъычыла бютюн да бек учунуб чала эдиле, республикабызны белгили тепсеучюлерине, джырчыларына тынгылай. Керти къууанч халда, уллу кёл кёлтюрюм бла ётдю бу байрам. Аллах къууанчдан айырмасын. Хорламлыланы биз да алгъышлайбыз. «Чалкъычычыкъларыбызныкъычыкъладанмыдыла?» деб, соргъаннга, таукел «хо» дерчабыз.
Къаракетланы Тамара.




