КъЧР-ни Башчысы Темрезланы Рашид салгъан борчну толтура, Правительствону къуллукъчулары, муниципал районлагъа айланыб, суу джетишмеген элледе адамла бла тюбешиб, суу системалада тинтиуле бардырыб, таза суу керекли киши инджилмезча этдирирге кюрешедиле.
Бу кюнледе ала Къобан районда болгъандыла. КъЧР-ни Правительствосуну Председателини биринчи орунбасары Смаккуланы Дагирни башчылыгъы бла кърал къуллукъчула анда уллу кенгеш бардыргъандыла. Ол кенгешге Къобан районну администрациясыны башчысы Семенланы Ахмат, КъЧР-ни къурулуш бла ЖКХ-ны хакъындан министрини орунбасары Беслан Озов, Регионлагъа къарагъан управлениени КъЧР-де аралыгъыны тамадасы Аппакъланы Ахмат, Къобан районда эл къуралышланы башчылары, джамагъатны суу бла баджаргъан организацияланы келечилери къошулгъандыла.
Кенгешде 2025-чи – 2030-чу джыллада толтуруллукъ «Инфраструктура для жизни» деген федерал программаны тамалында Къобан районну таза суу бла тохтаусуз баджарлыкъ система къурауну, ол районну эллеринде эски суу быргъыланы джангыртыуну юсюнден сёлешиннгенди.




