Къыркъар (август) айны 1-ден къралыбызда талай джангы закон кючюне киргенди. Бюгюн окъуучуларыбызны ол законланы бир къаууму бла шагъырей этерге излейбиз.

Элия айны 23-ден
СВО-гъа къошулгъанла бир къауум пошлиналаны тёлерик тюлдюле
Аскер къаугъагъа къошулгъанла бла аланы юйдегилери юрист магъанасы болгъан затланы тюзетирге сюдге тилек къагъыт джазсала, кърал пошлина тёлерик тюлдюле. Былайда сёз терекеге (наследство) ие болуу, джууукълукъну бегитиу дегенча затланы юслеринден барады.

Къыркъар айны 1-ден
Кёбчюлюк халда джиберилиучю билдириулени юсюнден
Адамла связны операторуна айтыб, кёбчюлюк халда джиберилген билдириуле (массовые рассылки) келиб турмазча этдирирге боллукъдула.

Акъыл-балыкъ болмагъанлагъа банк счёт ачыу
Акъыл-балыкъ болмагъанлагъа банк счёт ачар эмда картала берир ючюн, атала бла анала банклагъа эркинлик берирге керекдиле. Алай бла, джаш адамланы хыйлачыладан сакълар мадар боллукъду.

Конкуренцияны джакълауну джангы мадарлары
Конкуренциягъа тыйгъыч болгъан келишиулени ачыкълауну эмда къоратыуну хакъындан кърал информацион система къураллыкъды. Ол ишге Монополиягъа къаршчы кюреш бардыргъан федерал къуллукъ джууаблы боллукъду.

Къыркъар айны 3-ден
СВО-гъа къошулгъанлагъа ЕГЭ-лени эсеблерини болджалы созулгъанды
Аскер къаугъагъа къошулгъанла ВУЗ-лагъа кирирге деб берген ЕГЭ-лени эсеблерини болджалы, ала СВО-да болгъан кёзюуге созуллукъду. Алай бла, аскерчиле рахат джашаугъа дженгил юрениб, баш билим алыб, мийик дараджалы устала болур мадар табарыкъдыла.

Аскерчиле асыралгъан джерле бла эсгертмелени сыйсыз этгенле джууабха тартыллыкъдыла
Аскерчиле асыралгъан джерлени, эсгертмелени, Ата джуртну эркинлигин къоруулай джан бергенлеге аталгъан башха объектлени сыйсыз этгенле джууабха тартыллыкъдыла – аллай терслик этгенле беш джылгъа дери тюрмеге джыйылыргъа неда 5 мелиуан сомгъа дери тазир тёлерге керек боллукъдула. Бу джорукъ Эресейде эмда аны тышында орналгъан эсгертмеле бла байламлыды.

Маркировкасы болмагъан ички эмда тютюн продукцияны сатханланы джууабха тартыу
Маркировкасы болмагъан неда керекли информациясы джазылмагъан ички, тютюн продукцияны кёб санда чыгъаргъанла, асырагъанла, сатханла джууабха тартыллыкъдыла.

Адамны мыйысына къатылгъан, акъылын тюрлендирген затланы тизими къураллыкъды
РФ-ны Правительствосу адамны акъылын тюрлендирген затланы тизимин къурарыкъды. Ол тизимге тюрлениуле да Правительство кийирликди. Бу законну баш мураты – джамагъатны къоркъуусузлугъун эмда саулугъун бегитиу.

Басмагъа САЛПАГЪАРЛАНЫ Умар хазырлагъанды.

 
{jcomments}