Къарачай-Черкесия, РФ-ны Финансла министерствосу билдиргенине кёре, къралда инициатив бюджетированиени эм иги практиклерини тизимине тюшгенди.
КъЧР-ден сора ол тизимге Санкт-Петербург шахар, Ульяновск, Воронеж, Вологод, Тверь областла, Алтай, Хабаров крайла, Кърым, Коми, эмда Саха (Якутия) республикала, Ямало-Ненецкий автоном округ киргендиле.
Инициатив бюджетирование – ол бюджет ачханы юлешиуге адамланы къошулгъанларын кёргюзген затды.
2024-чю джыл конкурсну тамалында 7 заявка тюшгенди, аладан 6-сы былтыр джашаугъа сингдирилгенди. Ала да быладыла: Важное элде къабырланы къатында башы джабылгъан мекям (джатма) ишленнгенди; Красногор станседе христиан къабырлагъа буруу этилгенди; Къойданда сабий майданчыкъгъа джангы оборудование салыннганды; Сары-Тюзде Уллу Ата джурт къазауатда ёлгенлеге салыннган эсгертмеге тамамлы ремонт этилгенди; Джёгетей Аягъы шахарда 2-чи номерли христиан къабырланы бурууу джангыртылгъанды; Элтаркъачда межгитни къатында спорт-оюн майданчыкъ ишленнгенди.
Инициатив бюджетирование регионда кесине орун айырыб барады. 2025-чи джыл 8 муниципал райондан 21 проект тюшгенди. Ала да бу джумушла бла байламлыдыла: джолланы джарашдырыу; спорт комплекслени ишлеу, джангыртыу; фатар-коммунал мюлк бла байламлы объектлеге эс бёлюу, сабий майданчыкъланы къурулушлары; адамла кёб джюрюген джерлени джарашдырыу; маданият эсгертмелеге эмда къабырлагъа эс бёлюу.
Бу проектле барысы да быйыл джылны аягъына дери толтуруллукъдула.




