Озгъан ыйыкъны байрым кюнюнде республиканы ара почтасыны мекямында къууанч джыйылыу болгъанды. Ол Черкесск шахарны 200-джыллыкъ байрамына багъышланыб конверт марка чыгъарылгъанына аталгъан эди.
Къууанч джыйылыугъа республиканы почта бёлюмлерини къуллукъчуларындан сора да, Черкесск шахарны мэрини биринчи орунбасары Акъбайланы Ачемез, КъЧР-ни миллет ишлерини, кёбчюлюк коммуникацияла бла басманы министрини биринчи орунбасары Хубийланы Ислам, республикан кърал филармонияны тамадасыны борчларын толтургъан Бороков Рамазан, кёб джылланы почта бла шохлукъ джюрютгенлей тургъан абонентле дагъыда башхала келген эдиле.
Эресейни почта байламлылыкъны хакъындан управлениесини бизни республикада бёлюмюню тамадасы Лайпанланы Ахмат ал сёзю бла джыйылыуну ачды. Черкесск шахарны юбилейине аталыб, омакъ этилген почта марканы чыкъгъаны бла алгъышлаб, алайгъа келген адамлагъа да разылыгъын билдирди.
– Республикабызны ара шахарыны 200 джыл толгъан джарыкъ байрамына аталыб конвертлеге джораланнган 56 минг экземпляр марка хазырланнганды. Ол аз сан тюлдю. Эресейни кёб джерлеринден маркаланы джыяргъа сюйген къауум: «Бизге да бир ашырыгъыз юбилей маркаларыгъызны, бизни коллекцияны ичинде ол сыйлы орунну аллыкъды», – деб билдиредиле. Энди бизни ара шахарыбызны 200 джыл толгъаны бла байламлы марка Эресейни кёб джерине ашырыллыкъды, джуртубузну аты кенг джайыллыкъды, – деди Лайпан улу Ахмат.
Акъбайланы Ачемезге да берилди сёз. Ол маркада суратны магъанасы уллу болгъаныны, республиканы ара шахарыны тарихини бетлерин ачханыны юсюнден чертиб айтды. Анда, Черкесск шахарны Первомай орамында, бюгюннгю почтаны 90 джыл мындан алда тургъан мекямыны сураты эмда шахарны 200-джыллыкъ юбилейини логотипи салыннганды. Акъбай улу, алайгъа келген къонакъланы шахарны джарыкъ байрамы бла алгъышлаб, бу магъаналы джумушну этгенлеге да джюрек разылыгъын билдирди.
Юбилей маркаланы алыргъа излеген адам Черкесск шахарны 369000 индексли ара почтасында табаргъа боллукъду.
(БИЗНИ КОРР.).




