Джёгетей Аягъы шахарда джангы юлгю бла джууунуучу бассейн ишлеб тебрегендиле. Аны юсюнден Къарачай-Черкес Республиканы Башчысы Темрезланы Рашид МАХ мессенджерде джазгъанды. Спорт объектни уллулугъу 2000 квадрат метр чакълы барды.

Алайды да, заманны излемине джууаб этген бассейнде джууунургъа талпымакълыкълары болгъанла бла бирге белгили спортчула да тренировкаларын бардырлыкъдыла. Бир сменагъа алайда 35 адам суу спорт бла кюреширикди. Былайда кёб тюрлю иш бардырыллыкъды: джюзерге юретирикдиле, сабийлени эришиулеге хазырларыкъдыла, спорт эришиуле бардырлыкъдыла. Бюгюнлюкде бассейнни тамалы салыннганды, энди конструкциясын джарашдырыу башланныкъды.
– Бассейн хайырланыугъа теджелсе, сынгар шахарны тюл, бютеу Джёгетей Аягъы районну спорт аралыгъына буруллукъду.
Аны бла да къалмай, быйыл Черкесскеде джангы саулукъ сакълау комплексни къурулушу башланныкъды, гимнастика спортну олимпия резервини школуна тамамлы ремонт этиле турады, Курджиновода спорт къаланы ишлеб бошайдыла, Исправна бла Терезе элледе ГТО-ну джангы майданчыкълары, Апсуада «акъыллы» спорт майданчыкъ хазыр болгъандыла.
Республикан аралыкъны шимал джанында бассейнлери эмда спортзаллары болгъан спорт комплексни ишлеу да къызыу джюрюш бла барады, – деб джазгъанды Темрез улу.

 
{jcomments}