Къарачай-Черкесияда орта усталыкъ билим берген 20 окъуу учреждение барды. Кёб болмай 2025-чи – 2026-чы окъуу джылда ары къаллай бир сабий киргенини эсеблерин чыгъаргъандыла. Биринчи курсха киргенлени саны 3253 сабийге джетгенди – аланы кёбюсю инженер эмда медицина усталыкъ сайлагъанды.
– Джангы окъуу джылда колледжлеге 3253 адам киргенди, аладан 1960 студент, ол 60,2 процентни тутады, бюджет тамалда окъурукъду. 39,8 проценти да, 1293 студент, бюджетни тышында билим аллыкъды. Бютюн да уллу эс аскер къаугъада болгъанлагъа эмда аланы юйдегилерине бёлюннгенди. Быйыл аладан 102 адам биринчи курсха киргенди, – деб хапар айтхандыла КъЧР-ни Окъуу бла илму министерствосунда.
Анда билдиргенлерине кёре, окъургъа киргенлени асламысы къуру да инженер усталыкъны, технология бла техника илмуланы (34,97 процент), саулукъ сакълау бла медицина илмуланы (28,63 процент), аны кибик джамагъат илмуланы (26,32 процент) сайлаучанды. Устазлыкъны джолуна турургъа излегенле да 4,66 процент, санат бла маданиятны джолун сайлагъанла да 3,02 процент болгъандыла. 1,81 процент да эл мюлк усталыкъны тыйыншлы кёргенди.
Урунуу рынокда эм бек изленнген усталыкъланы эсге алыб, 2025-чи джыл бюджет орунланы санын ёсдюргендиле. Айтыргъа, мал дохтурлагъа (+25), конструирование бла дженгил промышленность технологияла (+25), саулукъ сакълаугъа да (+17, +25) орун берилгенди.
Республиканы колледжлеринде окъугъанланы 162-си аскер къаугъагъа къошулгъанла бла аланы сабийлеридиле. КъЧР-де джылны аллындан бери 200-ден аслам социал кесамат этилгенди.




