Къыркъаууз (сентябрь) айны 7-де Къарачай-Черкес Республиканы кюнюне эмда Черкесск шахарны 200-джыллыгъына аталыб бардырылгъан къууанч джыйылыуда Темрезланы Рашид регионну ёсюмюне, джашнарына тыйыншлы юлюш къошхан адамлагъа кърал саугъала берди. Ол иш Черкесскени таб джарашхан Джарыкълыкъ къаласында бардырылды.

Темрезланы Рашид саугъалауну башларны аллы бла джыйылгъанланы джарыкъ байрам бла алгъышлады.
«Мен бу къууанч ишге джыйылгъан багъалы, сыйлы къонакъла бла джердешлериме разылыгъымы билдиреме. Эки байрам бла да республиканы бютеу джамагъатын таза джюрекден джылы алгъышлайма. Бюгюн бу залда Черкесскени, бютеу Къарачай-Черкесияны ёсюмюне энчи юлюш къошхан белгили адамла джыйылгъандыла. Сиз барыгъыз да уллу сыйгъа, махтаугъа тыйыншлысыз.
Аллай мийик джетишимлеге ие болур ючюн, кече-кюн демей, къарыуугъузну, кючюгюзню аямай кюрешгенсиз. Бу къууанч бизни республиканы, уллу къралыбызны джашауу бла къысха байламлыды. Сизни патриотлугъугъуз, алгъа учунууугъуз, терен фахмугъуз, тутхан ишигизге толу берилгенигиз кёблеге юлгюдю. Ол чыгъармачылыкъгъа, ёхтемлиликге, бирикмекликге, шохлукъгъа учунууну шартыды.
Сизни кючюгюзден республика джыл сайын джангы, мийик джетишимлеге чыгъады. Экономиканы, промышленностну, билим алыуну, санатны ёсюмюне уллу юлюш къошасыз.
Сизни республикабызгъа, уллу къралыбызгъа къуллукъ этерге излеген ашхы сезимлеригиз, этген муратыгъыз хайыр келтирген, магъаналы джолну кёргюзеди.
Арт кёзюуде Черкесскеде этилген ашхы ишлени юслеринден айтыргъа излейме. Биз бюгюн залында олтуруб тургъан Джарыкълыкъ къалагъа тамамлы ремонт этилгенди. Эресей Федерацияны Президенти Владимир Владимирович Путин джашаугъа киргизирге аманат этген миллет проектле тола баргъанлары ачыкъ кёрюнеди. Бизни республиканы мингле бла адамларына чыгъармачылыкъгъа, окъургъа, билим алыргъа мадарла къураладыла. Биз, мындан ары да, Миллет Башчыбыз салгъан борчланы толтура, сабийлени, джаш тёлюню ёсюмюне джараулу болум, хайыр келтирген мадарла къурагъанлай турлукъбуз.
Къарачай-Черкесияны бютеу джамагъатыны эмда кесими атымдан, тамам усталыгъыгъыз, ашхылыкъ, игилик этерге излегенигиз, тёгерекде джашауну иги этерге кюрешгенигиз ючюн, разылыгъымы билдире, бюсюреу этеме. Сизни юйдегилеригиз къууанч бла, насыб бла рахатлыкъда джашасынла. Ала кеслерини гитче джуртлары бла, джуртубуз да ала бла ёхтемленсинле. Биз барыбыз бирге шахарыбызны, республикабызны, уллу къралыбызны бусагъат эмда келлик джашауун къурайбыз. Сизни барыгъызны да джарыкъ байрам бла алгъышлайма!» – деди Темрезланы Рашид.
Андан сора республиканы Башчысы талай адамны саугъалады.
«За заслуги перед Отечеством» деген II-чи дараджалы орденни медалы Зеленчук районда Ветеранланы бирлешлигини тамадасы Орусланы Магомедни джашы Назбийге берилди. Анга ол мийик саугъа Эресей Федерацияны Президенти Владимир Путинни Указы бла берилгенди.
КъЧР-ни Башчысы Темрезланы Рашид «Къарачай-Черкес Республиканы аллында махтаулу ишлери ючюн» деген орденле бла Эресей Федерацияны сенатору Крым Олиевич Казаноков бла Кърал Думаны депутаты Михаил Евгеньевич Старшиновну саугъалады.
Дагъыда талай белгили адамгъа джашауларында этген мийик джетишимлери, республиканы джашнарына къошхан энчи юлюшлери ючюн, сыйлы атла аталдыла.
Андан сора Черкесск шахарны тарихини юсюнден кино кёргюздюле. Джыйылыуну ахырында концерт болду.

Лепшокъланы Хусеин.

 
{jcomments}