Къралны башха регионларындача, бизде да кёбчюлюк бла этилген магъаналы ишле быйыл, Ата джуртну къоруулаучуну джылында, анга, айхай да, Уллу Хорламны 80-джыллыгъына да, аталыб, алай баджарыладыла.

Къыркъаууз (сентябрь) айны 6-чы, 7-чи кюнлеринде болгъан байрамла да – Республиканы кюню бла Черкесск шахарны 200-джыллыгъы – алагъа багъышланнган эдиле. Аны юсюнден КъЧР-ни Башчысы Темрезланы Рашид кесини официал сайтында алгъаракъдан огъуна джазыб билдирген эди.
СВО-да ёлген джигитлерибизге Черкесскеде, Хорламны паркында, деменгили эсгертме (мемориал) болургъа керекди деб тыйыншлы оноу этилиб, Джигитлени аллеясында аны тюб ташын салыб хазырлагъан эдиле. Анга аталгъан митингде Башчы Темрез улу Рашид, Черкесск шахарны мэри Алексей Баскаев, аскер къаугъалада урушлада болгъан ветеранла, СВО-гъа къошулгъан аскерчиле эмда аланы юйдегилери, дин башчыла, джамагъат бирлешликлени келечилери, сохтала, тюз шахарчыла, элчиле, башха джерледен келген къонакъла бар эдиле.
– Хурметли джамагъат! – деб башлады сёзюн КъЧР-ни Башчысы Темрезланы Рашид, эсгертмеге гокка хансла салыб, митингге сюелгенлеринде. – Бу сыйлы джерге байрамлада, башха эсгериу кюнледе болсун, адамла бери келиб, ёлген джигитлерибизге сый бергенлей турадыла. Уллу Ата джурт къазауатда, башха урушлада джуртубузну рахатлыгъы ючюн ёлгенлеге былайда салын-
нган эсгертмелеге кёб турмай энтда бир къошуллукъду – СВО-да джигитлик танытыб джан берген ётгюр джердешлерибизге аталгъан деменгили монумент. Аны тюб ташы салыннганды, бюгюн аны кёбчюлюк бла бирге ачаргъа деб келгенбиз.
Ызы бла дин башчыла – республиканы муфтийи Эриккенланы Мухаммат хаджи эмда Къарачай-Черкесияны шимал округуну протоирейи Александр Нартов дууа окъугъанларындан сора, Рашид Бориспиевич СВО-да уруш этген аскерчи джашла бла бирге эсгертме ташны юсюнден джабыуун алдыла.
Митингде джыйылгъанланы алларында СВО-да атын айтдыргъан аскерчи джердешлерибизни бири, «Герои Карачаево-Черкесии» деген программагъа къошулгъан джаш Беслан-Бек Теуважуков, республиканы башчылыгъына, СВО-чулагъа уллу эс бёлгенлей, болушханлай тургъаны ючюн, разылыкъ билдириб сёлешди. Аны айтханына митингге келгенле да разы болуб тынгыладыла.

Ёзденланы Якъуб.

 
{jcomments}