Бу кюнледе Къарачай-Черкесияны Башчысы Темрезланы Рашид «Движение Первых» деген кърал-джамагъат къозгъалыуну регионал бёлюмюню Координацион советини кенгешин бардыргъанды.
«Движение Первых» деген къозгъалыуну регионал бёлюмю РФ-ны Президенти Владимир Путинни излеми бла 2023-чю джыл байрым (февраль) айны 22-де ишлеб башлагъанды.
Бу къозгъалыу бютеу къралда сабийлени да, джаш тёлюню да бирикдиргенди. Ол ёсюб келген фахмулу тёлюге джол ачар, тарих бетлени эсгерте, джаш адамланы патриот ангыларын бегитир мурат бла къуралгъанды.
Координацион советни кенгешинде ол джаны бла проектле къалай толтурулгъанлары сюзюлгенди, этилирге керекли ишле да белгиленнгендиле.
Кенгешни ача, Темрезланы Рашид «Движение Первых» деген къозгъалыуну башламчылыгъы бла федерал, регионал дараджалы бек кёб проект толтурулгъанын, аланы араларында Уллу Хорламны 80-джыллыгъына аталгъанла да болгъанларын чертгенди.
«Бу тарих магъаналы байрамыбызгъа атаб этген ишлери ючюн, «Движение Первых» къозгъалыуну келечилерине разылыгъымы билдиреме. Бютеу Эресейде толтурулгъан «Зарница 2.0» проектни регионал дараджада таб къурагъанларына бюсюреу этеме. Бу проектге къошулгъанланы саны бизни республикада 10 мингден атлагъанды, саулай къралда уа мелиуанла болгъандыла», – дегенди Темрез улу.
Кенгешде 2025-чи джылны ал джарымында «Движение Первых» къозгъалыуну регионал бёлюмю баджаргъан ишлени юслеринден аны тамадасы Къочхарланы Алина хапар айтханды.
Ол чертгенден, 2025-чи джылны ал сюреминден бери къозгъалыуну келечилери 40 проектни толтургъандыла, ала этген ишлерине 20 минг сабийни къошхандыла. Бу джылны ахырына дери энтда 30 проектни толтурур муратлыдыла. Хар ишлери да умут этгенлерича болса, ол ишлеге да 50 минг сабий къошуллукъду. Аладан 15 минг чакълы бири «Движение Первых» къозгъалыуну ишинден джангы хапарлы боллукъду.
Бу къозгъалыугъа къошулгъан сабийлени бир къаууму, элия (июль), август (къыркъар) айлада «Альтаир» деген шатыр лагерде, «Беслан», «Лесной», «Жемчужина Кавказа» лагерледе солуб, энчи ёсюм алыр мадар табханды.
«Биз былай джетишимли боллукъ болмаз эдик, уллу кёлтюргючлюк табмасакъ. Сизни болушлугъугъуз бла ёсюм алыб, районлада да бёлюмле ачыб, тири джюрюш бла алгъа барабыз. Бизни регионда «Движение Первых» къозгъалыуну 4 муниципал аралыгъы джарашыб ишлеб башлагъанды. Джылны ахырына дери бютеу муниципал къуралышлада да аралыкъла ачаргъа мурат этебиз», – дегенди Къочхарланы Алина, КъЧР-ни Башчысына разылыгъын билдире.
«Движение Первых» къозгъалыуну муниципал аралыкълары материал-техника бла къалай баджарылгъанларыны юсюнден КъЧР-ни джаш тёлю ишлерини хакъындан министри Тотуркъулланы Ибрагим хапар айтханды.
«Значимый Взрослый» деген проектни бизни республикада толтурууну юсюнден да КъЧР-ни сабий омбудсмени Ала-
къайланы Мария: «Бу проект къыйын болумда джашагъан сабийлеге насихатлыкъ этиуге аталгъанды. Аны тамалында насихатлыкъ этериклени билимлерин ёсдюрюу, профилактика бардырыргъа керекли болуб, эсебге тюшюрюлген эмда ёксюз къалгъан сабийлеге тыйыншлы эс бёлюу дегенча ишле этиледиле.
2024-чю – 2025-чи джыллада «Значимый Взрослый» деген проект, Къарачай-Черкесия да къошулуб, Эресейни 11 субъектинде сынау халда толтурулуб тебрегенди. Аны кючю бла 80 адам, психология джаны бла билимин ёсдюрюб, насихатлыкъ этерча болгъанды.
Бу ишге устазла, врачла, спортчула, журналистле, власть органланы къуллукъчулары бек кёлленнгендиле. Аланы бир къаууму ишлеб башлагъанды. Алай бла, 24 сабийге насихатлыкъ этилиб башланнганды», – дегенди.
«Движение Первых» къозгъалыуну проектлерини хапарларын джетишимли, болумлу джаш адамла Мурат Астежев, Наиля Баисова, Биджиланы Елана, Ренат Кармов айтхандыла.
Кенгешге къошулгъанла кёбчюлюкге джарарыкъ башламчылыкълагъа, волонтёрланы ишлерине, фахмулу джаш адамлагъа кёлтюргючлюк этиуге, «Движение» платформа бла билим ёсдрюр мадарлагъа да тыйыншлы эс бёлгендиле.
Кенгешни ахырында КъЧР-ни Башчысы Темрезланы Рашид, джаш адамланы ашхылыкълагъа учуннганларына къууанганын черте, алагъа джол тюзетгени ючюн, «Движение Первых» къозгъалыуну регионал бёлюмюне бюсюреу этгенди.
Аны юсюнден Башчы MAX мессенджерде кесини каналында: «Бюгюнлюкде «Биринчилени» тизиминде Къарачай-Черкесиядан 24 минг джаш адам барды. Къозгъалыуну къурамына хакъ джюреклери бла Эресейни кючюн, къадарын къатларгъа излеген джаш адамла киргендиле. Ала алгъа таукел къарагъан, джити, болумлу, фахмулу адамладыла.
Быллай тюбешиуле мындан ары да ашхылыкъла этерге учундурадыла, кюч бередиле. Тюзюуюн граждан къарамыгъыз ючюн, «Биринчиле» болургъа тырмашханыгъыз ючюн, сау болугъуз! Аллыбызда джангы проектле, сынаула, хорламла сакълайдыла. Сиз алада да баш болуругъузгъа базама! «Движение Первых» къозгъалыуну тамадасына да, джаш тёлюню хар неге юретиб кюрешген устазларына да разылыгъымы билдиреме», – деб джазгъан-
ды.




