Биз барыбыз да къралыбызны тынчлыгъы бузулгъан кëзюуде бир-бирибизге билек болургъа керекбиз. «Адам къатында адам ëлмейди» дегенлей, къалай иги шартды башха адамгъа джан аурута билген, болушургъа тырмашхан.

Бизни джердешибиз, Учкулан элде джашагъан Биджиланы Джамиля да аллай адамды. Бу джигит къыз, къралына керек кюн, артха турмай, кёб хайырлы иш этиб джюрюйдю. Ол, волонтёр болуб, аскер къаугъа бара тургъан джерге да барыб келген эди былтыр. Мен хаман да волонтëрланы ëтгюрлюклерине бек сейирсине эдим, ол себебден Джамилядан хапар сордум. Ол Донецк бла Луганск Халкъ Республикалагъа эмда Херсон бла Запорожьеге барыб келгенин билдирди, сабийле бла тюшген талай сурат да кëргюзюб, аланы хапарларын да айтды. Сёз ючюн, оналты джыл болгъан бир джашчыкъ школда не тенглерин, не устазын эшитмейин, джунчуб тургъанды. Джамиля, сангыраугъа джараулу къулакъгъа салыннган аппарат табыб, анга саугъа этгенди. Ёксюз къалгъан алты сабийни кеслерине алгъан эки къарт бла тюбешгенин да эсине тюшюрдю къыз. Башха сакъат джашчыкъны хапарын да айтды. Аны анасыны машинасы болмагъаны амалтын, къагъытларын джарашдыралмай, сабийге къралдан ачха тëленмей тургъанды. Сора Джамиля кеси, джашчыкъны анасын алыб барыб, къагъытланы джарашдырыргъа болушханды.
Бу хапарланы эшитгенимде, бизни къатыбызда аллай халал адам болгъанына джюрегим бек къууаннганды. Дагъыда бир суратда Джамиля бла Уллу Ата джурт къазауатны кёзю бла кëрген къарт амманы эследим. Джамиля кеси, аны юйюне барыб, Къартланы кюню бла алгъышлаб, саугъала бериб, бюсюреуюн билдиргенди. Алай бла, къарт адамны кëлюн кëлтюргенди...
Къаллай бир ëтгюрлюк, чомартлыкъ керекди адамлагъа болушур ючюн? Къуру бир кере келиб кетмейин, айла бла къазауат бара тургъан джерде джашаргъа?!  «Хар гуманитар болушлукъну, сёз ючюн, джылы кийимлени элчиле бла бирге джыйыб, адамлагъа къыйын кюнлеринде болушургъа керекди», – дейди ол. 
 Биджиланы Джамиляча адамгъа джан аурута билген, джетген кюнде Ата джуртуна джарагъан халал джюрекли къызларыбыз кëб болсунла! 

Аджиланы Разима.

 
{jcomments}