Къарачай шахар округну Мара Аягъы посёлогуну Горная орамында ара суу быргъыны къурулушу тамамлана турады.
Къарачай шахар округну къурулуш эмда фатар коммунал мюлк бёлюмюню тамадасыны орунбасары Батчаланы Владимир айтханнга кёре, джангы суу быргъыны узунлугъу 1150 метрди. Ала 63 миллиметр диаметри болгъан полиэтилен быргъыладыла, былайда насос оборудование да джарашдырылгъанды.
– Бусагъатда насос станцияда ууакъ-тюек ишле бла кюрешедиле, аладан къол айыргъанлай Горная орамда джашагъан адамла ара суу быргъы бла хайырланыб тебрерикдиле. Адамланы юйлерине таза суу тохтаусуз барлыкъды. Былайыны джамагъаты суу къытлыкъны сынамазча боллукъду. Объектни къыркъар (август) айны ара сюремине хайырланыугъа теджер мурат барды, – деб чертгенди Батча улу.
Ол айтханнга кёре, къурулуш ишле къыйыныракъ баргъандыла, нек десенг, джерни бир джери мийик, бир джери алашаракъ болгъанды. Аны бла, 70 метр айрылыкъ болуб, алгъын быргъыдан суу орамны баш джанына чыгъалмагъанды.
– Бу затны барысын да эсеблегенбиз. Насос станцияны салгъан заманда резерв оборудованиени да къайгъысын кёргенбиз. Ол зат сууну бузукъсуз барырына джол ачханды. Эм игиси уа неди десенг, адамла, суу бла толу хайырланнган бла къалмай, аны тазалыгъына, кирсизлигине да къууанныкъдыла, – деб къошханды Батчаланы Владимир.




