Гитче Къарачай районну Ючкекен элинде «Гитче Къарачай» деген спорт комплексге тамамлы ремонт этиб тебрегендиле.

Джарашдырыу ишле быйыл хычаман (май) айда башланнгандыла. Проектни баш мураты комплексни заманны излемине джууаб этерча джарашдырыуду, былайы адамланы сюйген джерлери болурча этиудю.
Алай бла, планда белгиленнгенине кёре, бу спорт комплексни джангыртылмагъан джери къаллыкъ тюлдю: футбол тюзню тюбюне джангы чыдамлы материал тёшелликди, темирден джангы буруу этилликди, дренаж система джарашдырыллыкъды, чабыучу джолчукълагъа резин салынныкъды (ЕПДМ), джарыкъ лампала джанарыкъдыла, комплексни ичи-тёгереги да кирсиз эмда омакъ боллукъду, аланы гитче архитектура формала джасарыкъдыла. Айтыргъа, Гитче Къарачай районну джамагъатына былайы аламат саугъа боллукъду.
Бюгюнлюкде къурулушчула ишни 20 процентинден къол айыргъандыла. Джылны аягъына былайда хар зат да орнун табарыкъды. Ремонт ишле тамамлансала, «Гитче Къарачай» деген стадион районну эм ашхы солуу эмда спорт бла кюреширге мадар берген аралыгъына буруллукъду.

 
{jcomments}