- Подробности
Мындан алда КъЧР-ни Башчысы Темрезланы Рашид республиканы Джамагъат палатасыны пленар кенгешини ишине къошулгъанды. Ары дагъыда Джамагъат палата бла къысха байламлылыкъ тутхан, закон чыгъарыучу эмда толтуруучу властланы органларыны, муниципал районла бла шахар округланы администрацияларыны тамадалары, КъЧР-ни Джамагъат организацияларыны миллетле арасы советини къурамына кирген джамагъат организацияланы председателлери баргъан эдиле.
Темрезланы Рашид Къарачай-Черкесияны Джамагъат палатасы бла председателине граждан обществону ёсдюрюр мурат бла бардыргъан ишлери ючюн бюсюреу этди.
«Регионда Джамагъат палатаны магъанасы ёсгенден ёсюб барады. Организацияланы тириликлери кърал органланы, муниципал властланы органларыны ишлеринде ачыкъ кёрюнеди. Коммерция бла кюрешмеген организацияла бла, Бютеуроссия Халкъ фронт бла, миллет джамагъат организацияла бла, эм бек кереклиси уа, республиканы джамагъаты бла бардырылгъан ишлени уллу магъаналары барды», - деди Темрезланы Рашид.
Башчы андан сора Къарачай-Черкес Республиканы Правительствосунда Джамагъат советле, министерствола, ведомствола, муниципалитетле, КъЧР-ни Джамагъат палатасы бла биригиб, тири ишлерге кереклилерине джыйылгъанланы эслерин бурду.
- Подробности
2018-чи джыл хычаман (май) айны 9-да – Уллу Хорламны кюнюнде – Къарачай-Черкес Республиканы ара шахарында 4 мингнге джууукъ аскерчини аты джазылгъан мемориал комплекс ачыллыкъды.
Бизни бюгюннгю джарыкъ джашауубуз ючюн джашлай джанларын уруш тюзледе бергенлени эмда фашистледен Джуртубузну тазалагъанланы атларын ёсюб келген тёлюле билирге керекдиле.
«Черкесск шахарны мэриясы бла шахар Думаны депутатлары, оноулашыб, «Ёмюрлюк отну» мемориалыны къатында орналгъан Махтауну аллеясында аскерчиге эсгертме бла мемориал ишлерге келишген эдиле. Ол мемориалны юсюнде шахардан Уллу Ата джурт къазауатха кетгенлени барысыны да атлары джазыллыкъдыла», - дегенди Черкесскеде джашагъан урушну ветеранлары бла тюбешген кёзюуюнде Къарачай-Черкес Республиканы Башчысы Темрезланы Рашид.
- Подробности
Багъалы джердешле!
Сизни барыгъызны да Эресейчи Парламентаризмни кюню бла алгъышлайбыз!
Бу кюн байрамланы россиячы орузламасына 2012-чи джыл никкол айны 27-де – Эресейни биринчи Кърал Думасы ишлеб башлагъан кюн – тюшгенди.
Эресей Федерацияны бусагъатхы Парламенти, демократияны белгиси болуб, къралны аллында тургъан борчланы толтурууда магъаналы ишлени тындырады; Эресейни адамларыны джашауларын игилендириу бла байламлы законла джарашдырады эмда алады.
Къарачай-Черкесияны Халкъ Джыйылыуу (Парламенти) да, республиканы шахарлары бла районларыны келечилик органларын бирикдириб, Къарачай-Черкесияны политика системасыны баш чыгына саналады. Толтуруучу властны органлары бла, аны кибик кеси оноуларын кеслери этген джергили органла бла къысха байламлылыкъда ишлей, депутатла законланы бегитиуге, социал-экономика магъаналы ишлени толтуруугъа уллу юлюш къошадыла.
- Подробности
Республиканы багъалы ахлулары! 29 джылны мындан алгъа «Репрессиялагъа тюшген халкълагъа реабилитация этиуню юсюнден» закон алыныб, ол къыйынлыкъланы чекген миллетлеге джангырыр ючюн кюрешир мадар берилген эди.
Ётген ёмюрню биринчи джарымында кенг бардырылгъан кёчгюнчюлюкню ачыуун кёб халкъ сынагъанды. Аланы ата-бабаларыны джерлеринде джашар эмда сабий ёсдюрюр эркинликлери сыйырылыб эдиле. Алай бла Къарачай-Черкесияда къарачайлыла бла къазакъла да киши джерлеге кёчюрюлген эдиле. Алагъа киши джуртлада ётдюрген джыллары джигитликлери бла тёзюмлюлюклерин сынауну эмда биригиуню джыллары болгъандыла. Кёчгюнчюле, джюреклеринде тюзлюкню келирине ийнанмакълыкъларын, Ата джуртха сюймекликлерин сакълай, ол сынауладан сый бла ётгендиле.
- Подробности
Багъалы джердешле!
Чернобыль АЭС-де XX-чы ёмюрню эм уллу техноген къыйынлыгъы болгъанлы арадан 32 джыл ётдю. Ол къыйынлыкъда уа бизни миллионла бла адамларыбыз джарсыгъан эдиле. Аны юсюне да ол ызларына къайтарыргъа къолдан келмезлик уллу къоранчла салгъан эди.
Чернобыль АЭС-де болгъан къыйынлыкъ сагъайтмагъан инсан къалмагъанды. Уллу къралны джюз мингле бла адамлары, саулукъларына къоркъуулу болгъанына да къарамай, ол техноген къыйынлыкъны онглар мадарла этиб кюрешгендиле. Чернобыль АЭС-де болгъан къыйынлыкъны хатасын онглар ючюн кюрешгенлени ичлеринде Къарачай-Черкесиядан да 1200 адам болгъанды, аладан 400 адам ауушханды; биз алагъа ол заманда этген эркишиликлери бла чыдамлыкълары ючюн джюрек разылыгъыбызны билдиребиз.
