«Бир игилик он игилик туудурады,

Аманлыкъ а къанны къан бла бла джуудурады».

Нарт сёз.

Кёб болмай биргеме ишлеген джаш ишге келиб, бетинде да къайгъыргъаны таныла: «Уллу затха да санамайма, алай а джайлыкъгъа иерге кёзюм къыймай тургъан джангы туугъан эгиз къозучугъу бла къоюм джангур джаугъанында эшикде къалгъан эдиле да, къайры тас болгъанларын билмейме», –  деб хапар айтхан эди. Тенгими бир иги халиси барды, адамгъа аман айтыргъа чыртда сюймейди.

         Арадан тёрт-беш кюн озгъандан сора, биягъы тенгим бла тюбешиб, олтуруб тургъанлайыкъгъа хапарын башлады. «Айланмагъан джерим къалмагъанды, алай а ол тас болгъан къоюм бла эгиз къозучукъланы табалмадым. Башыбыз орнуна болсун», – деди.

        Биз да ушагъыбызны бардыра тургъанлай, тенгими телефонуна къонгурау этдиле. Ол къонгурау ачханны:  «Гогуйланы Асланмыса?» – деген ауазын ачыкъ эшитдим. Тенгим «хоу» дегенден сора, аны бла сёлешген дагъыда неле эсе да айтды, алай а мен ангыламадым. Тенгими бети тюрленнгенча кёрдюм да, «тынчлыкъмыд?» деб сорургъа да изледим, алай болса да, ичимден: «Къой, бир айтыр  сёзлери болур…» –  деб, эшикге чыкъдым.

          Бир кесекден ызыма киргенимде, Асланны бети да джарыб: «Сау бол, сау бол!» –  дей тургъанын эшитдим.

         Аслан сёлешиб бошай, телефонун джукълата, ышарыб меннге къарай: «Беш кюн арадан озгъандан сора табылдыла тас болгъан къоюм бла къозуларым!» – деди. Терен солуб, хауаны ёпкелеринден чыгъара, сейирсиннгенча кёзюме къарай: «Мен Борлакъланы Ёскама. Къоюнг бла къозуларынг менде турадыла. Кимникиле болгъанларын табалмай тургъанма.

 Кел да ал!» – дейди, саукъаллыкъ…» – деди Аслан.

         – Да Аслан, сау болсун ол Ёска деген керти адамлыгъы болгъан джашха ушайды. Ол затха биз бюгюнлюкде сый-багъа бергенликге, эртделеде ол нормагъа саналгъанды. Бурун алай болгъанды бизде, ичинде бузоуу болгъан ийнек бла кишенли атха тиймегенди не залим гудучу болса да. Гуду къачан да сыйгъа саналмагъанды. Бюгюн Борлакъ улугъа къонгурау этдире тургъан да миллетибизни ол иги, таза къаныды, – дедим мен да.

        - Ол алайды, алай болса да, бу заманны кёзю бла къарасакъ, Борлакъланы Ёскача джашлагъа бюсюреу-сыпас этерге борчлубуз. Не этейим мен Ёскагъа? Не игилик этейим? – деб сагъышлана, Аслан ёрге туруб, – да ашхы сора, къууанч бла тюбешейик! – деб, къол узата, джолуна атланды.

ИЖАЛАНЫ Умар,

РФ-ны Джазыучуларыны союзуну члени.