Къарачай-Черкесияны 25-джыллыгъына аталыб ётген солуу кюнледе джюзюуден «Весёлые старты» деген эришиуле болгъандыла.
Алагъа къараргъа «Джашил айрымканда» «Юность» бассейннге кёб адам джыйылгъан эди. Эришиулени къууанч халда ача, КъЧР-ни физкультура бла спорт министрини заместители Тенц Дмитрий джаш спортчулагъа уллу хорламла теджегенди.

Бу эришиулеге 6-7-джыллыкъ сабийледен 20 адам чакълы бир къошулгъандыла. Ала бары да Черкесск шахарны 19-чу  номерли орта школунда спорт классха джюрюген джашчыкъла бла къызчыкъладыла. Ол спорт класс КъЧР-де Джюзюуню федерациясыны башламчылыгъы бла къуралгъан эди.
- Быллай эришиуле сабийлени спортха тырмашдырадыла, мизамгъа юретедиле, - дейди спортну бу тюрлюсюнден устасына кандидат Ткаченко Ольга.
Бу гитче сабийле спорт бла кюрешиб башлагъанлы кёб заман болмаса да, ала, къоркъмай, 25-метрлик дистанцияны онглаб, иги джетишимлеге чыкъгъандыла.  Эришиулеге къошулгъанланы барына да сыйлы грамотала берилгендиле.