"Сабийлеге бирча мадар» деген Бютеуэресей Халкъ фронтну проектини волонтёрлары 700-ден аслам хакъсыз кружокла, секцияла ачхандыла.

Аны къурамына 20 мингден аслам джаш адам киреди. Аны юсюнден Бютеуэресей Халкъ фронтну ара штабыны члени, Кърал Думаны Билим бла илмуну юсюнден бёлюмюню башчысыны заместители Любовь Духанина айтханды. «Проектни активистлери – джаш адамла, тюрлю-тюрлю санагъатланы усталары, фахмулу адамла, устазла болуб ишлеген ата-анала – сабийлени не тюрлю къаууму бла да ишлерге къоркъмайдыла. Ала ачхан кружокла бла секциялагъа кёб сабийли, къарыусуз джашагъан юйдегиледен сабийле, ёксюз сабийле эмда закон бла къайгъылары болгъан сабийле джюрюйдюле», - дейди Любовь Духанина.

Сёз ючюн, Киров областда ОНФ-ны активистлери бла  «Street Workout Kirov» деген къозгъалыуну биригиб ишлегенлери бла кёб сабийли юйдегиледен сабийле воркаутха (орам гимнастика) хакъсыз юренирге мадар табхандыла. Курск областдан волонтёрла «Билирге тыйыншлыды» деген кружокда ёксюз эмда джакъсыз сабийлеге аланы эркинликлерини юслеринден хапар айтадыла, болушлукъ излеб келген сабийлеге болушадыла. Тыва Республиканы ара шахары Къызылда Юйдегилеге эмда сабийлеге социал болушлукъ табдырыу аралыкъда эсебде тургъан сабийлени каратэге юретген хакъсыз секция ишлегенли джыл джарым болады. Ленинград областда уа къыйын джашау болумда тургъан сабийлеге къоянчылыкъны юсюнден кружок ишлейди. Быллай юлгюле дагъыда кёбдюле.

Волонтёрла сакъат сабийлеге эмда саулукъларындан къыяулары болгъан (ОВЗ) сабийлеге дерсле бередиле. Аллай сабийлеге джораланыб 50-ден артыкъ кружок бла секция ачылгъанды – сурат салыргъа, тюрлю-тюрлю керекледен затны джыяргъа юретедиле эмда реабилитация этедиле. Бардырылгъан ишлени эсеблери къууанырчадыла…

Аны бла да къалмай, Бютеуэресей Халкъ фронтну активистлерини болушлукълары бла «Персонифицированное финансирование» деген механизм ишлеб башлагъанды. Бюгюнлюкде ол механизм Эресейни 20 регионунда джашаугъа сингдириле турады. РФ-ны Окъуу министерствосуну кёргюзюмлерине кёре 400 мингден артыкъ сабий 3,7 минг организацияда (111-и кърал организацияла тюлдюле) сертификатла бла къошакъ билим аладыла. «Персонифицированное финансирование» деген механизмни законопроект бла бегитиу ОНФ-ны «Сабийлеге бирча мадар» деген проектини баш муратыды. Бюгюнлюкде бу механизмге Кърал Думада къарала турады.

Окъуу волонтёр къозгъалыуну ёсюмюне, кружокла, секцияла ачыуда волонтёрлагъа болушуу мындан ары да ОНФ-ны баш муратларыны бириди.

 Бютеуэресей Халкъ фронтну пресс-къуллугъу.