Аууз-герги (октябрь) айны 14-де Къарачай-Черкесияны ара шаарында «Къобан сууну башында Покрова» аты бла Шыйых Богородицаны байрамына джораланнган биринчи фестиваль болуб ётгенди.

Шыйых Богородицаны (христиан динде Иссаны анасына айтадыла) байрамына джыйылгъанланы Черкесскени мэрини биринчи заместители Алексей Баскаев алгъышлагъанды. Ол кёб миллетли, кёб динли Къарачай-Черкесияны халкълары кёб джылланы иги хоншулача, шох, татлы, бир-бири сыйларын кёрюб, бир-бири адетлерин ангылаб, джарашыулукъда джашагъанларын чертгенди.

«Бюгюн биз Къарачай-Черкесияда барыбыз да рахатлыкъда, джарашыулукъда, биригиб джашагъанларына шагъатбыз. Мен хар биригизни бу джарыкъ байрам бла алгъышларгъа излейме. Рахатлыкъ, ашхылыкъ эмда мелхум джашау теджейме», - дегенди ол.

«Джашил айрымкан» деген культура бла солуу паркда къууанч халда «Къазакъланы оюнлары бла сабий джубанчлары» деген спорт эришиуле, Черкесскени мэрини ёчю ючюн къазакъ спорт эришиуле башланнгандыла.

Атаманны башчылыгъы бла джаш къазакъчыкъла лагъымлылыкъны, усталыкъны, джигитликни, батырлыкъны кёргюзгендиле.

Джарыкъ бояулу, айбат миллет кийимледе сабийле, джырлаб, тепсеб, элбер оюнну эмда къыйын джомакъланы джууабларын тынч, дженгил билиб джамагъатны сейирсиндиргендиле. Ала, бир-бирлерине ал бермезге кюреше, керти спортчулача, сынауладан ётгендиле.

Дагъыда байрамда Къарачай-Черкесияда джашагъан халкъланы миллет арбазлары къуралгъандыла. Къарачай, ногъай, абаза, къазакъ, черкес, тегей эмда рум арбазла къонакълагъа эшиклерин кенг ачхандыла. Ала миллет хантланы теджегендиле къонакълагъа. Республиканы джамагъаты эмда тышындан келген къонакъла бир арбаздан бирине кёче, къарачай айран бла, тегей хычынла бла да зауукъланнгандыла.

Хар арбазда къонакълагъа, кавказ адетдеча, сый бла тюбегендиле. Айхай да, быллай байрам кюнде тепсеу да кёб болгъанды. Рум тепсеучюле «сиртаки» деген миллет тепсеулерин кёргюзгендиле.

Учундургъан макъамла, тепсеуле, татлы затла бла тюбегендиле къонакълагъа азербайджан арбазда. Кеслерини къонакъбайлыкълары бла ашарыкъ этиуге усталыкъларын къазакъла да кёргюзгендиле. Баянны джарыкъ тауушу эжиу эте, миллет джырларын джырлагъандыла ала.

Байрамгъа келгенле санагъатчыланы кёрмючлеринде республиканы къол усталарыны затлары бла шагъырей болгъандыла.

Байрам, «Вирасы» деген джыр-инструментал ансамбль да къошулуб, уллу гала-концерт бла тамамланнганды.

Эсигизге салайыкъ, 1825-чи джыл аууз-герги (октябрь) айны 14-де Шыйых Богородица джакълыкъ этген кюн джангы къуралгъан Баталпаша стансеге биринчи кёчгюнчюле келиб тюшгендиле. Тарихде ол болгъан затны эсгере, къазакъ клисаны Шыйых Богородицаны кюнюне джоралаб джарытхандыла. Алай бла Покров клисагъа быйыл 175 джыл болады.

(БИЗНИ КОРР.).