Бу кюнледе Черкесскеде Абу-Ханифа имамны атын джюрютген республикан Ислам институтну юбилейин белгилей, уллу къууанч джыйылыу болду. Ислам институт 25 джыл заманны эллеге, шахарлагъа, дин организациялагъа дин къуллукъчула хазырлайды.
«Совет власть оюлгъан джыллада бютеу Ставрополь крайда (Къарачай-Черкес автоном область да ары кириб) къуру 15 межгит бар эди. Имамла хазырларгъа керек болду. Биз Ислам институт ачаргъа оноулашдыкъ да, ачдыкъ. Бюгюнлюкде Аллахха шукурла, бизни Ислам институтубуз тыйыншлы дараджадады. Дерс бергенлени арасында Аль-Азхар деген белгили муслиман университетден келиб ишлеген профессорла бардыла. Мен ара Эресейни, Татарстанны, Москваны дин окъуу заведениелерин да кёргенме. Бизни институт чыртда аладан артха къалмайды.
Ислам институтну къуралырына юлюш къошхан аны биринчи ректору Бостанланы Исмаил хаджи эди. Ол 9 джылны мындан алгъа ёлгенди, джандетли болсун. Ол заманда Муслиманланы дин управлениесини секретары болгъан Катчиланы Ибрагим хаджи бла бирге биз биринчи устазланы излеб кюрешген эдик. Кесибизникиле джокъ эдиле, тышындан чакъырыргъа бек къыйын эди. Алай болса да, Аллах болушуб, устазла табылдыла.
Бюгюнлюкде Ислам институтну ректору Исмаил хаджини эгечинден туугъан Ёзденланы Расулду. Ол Сирияда баш билим алыб келгенди. Ана къарнашыны ишин тыйыншлысыча бардырады», - деди Шимал Кавказны Муслиманларыны бирикдирген аралыгъыны председатели, КъЧР-ни муфтийи Бердиланы Исмаил хаджи.
Аны ызындан Евгений Кратов сёлешди.
«Бизни республикада Ислам институтну къуралгъаны тюздю. Биз тыш къраллада алгъа элтген ислам аралыкъланы сыйлайбыз. Бизни институтха дунияда эм иги университетледен келиб, джаш адамланы диннге юретгенлери ашхыды. Бизни республикада мамыр джашау орун алыб туруруна межгитледе, медреселеде, институтлада ишлегенле энчи юлюш къошадыла. Ала адамлагъа, тюрлю-тюрлю миллетлени келечилерине, тюз сагъыш этерге, болумну сюзе билирге, таб, тыйыншлы оноу этерге юретедиле. Мамыр джашау орун алыб туруруна, келлик заман иги болуруна къайгъырадыла», - деди Е. Кратов.
Бусагъатда республикада баш профессионал муслиман окъуу берген джангыз учреждениени баш борчу, адамланы ашхылыкъны, игиликни, рахатлыкъны джайгъан таза диннге, араб тилге окъутууду. КъЧР-ни муфтийи эсгергенден, эм биринчи сохтала 15 болгъандыла. Биджиланы Расул хаджи да институтну ачылыууна энчи юлюш къошханды. Ислам динден билим алыргъа излеген джаш адамла, къалай этерге билмей, тыш къраллагъа барыргъа деб тургъанлай, институт ачылгъанында мында къалгъандыла. Ала тюрлю-тюрлю миллетлени келечилеридиле. Институт къуралгъанлы бери анда билим алгъанланы саны 4000-нге джетеди. Дипломла алыб чыкъгъан устала 400-ден асламдыла.
Бюгюнлюкде былайда очно, заочно эмда энчи график бла 77 студент окъуйду. Ала хоншу Шимал Кавказ субъектледен тышында, Эресейни тюрлю-тюрлю регионларындан да келгенледиле. Бу институтда диннге юрениу кёб тюрлю миллетлени келечилерин бирикдиреди.
Институтдан чыкъгъанланы 80 проценти республиканы эллеринде имамладыла. Ала къралыбызны башха джерлеринде да дин ишле бардырадыла. КъЧР-ни, Краснодар, Ставрополь крайланы, Къабарты-Малкъар, Чечен республикаланы, Ростов, Мурманск, Архангельск областланы межгитлеринде имам-хатыбла болуб ишлейдиле. Джамагъатны тин-иннет ёсюмюне энчи юлюш къошадыла.
«Бизни институтну бошаб чыкъгъанла Эресейни кёб тюрлю регионларында ишлегенлерине биз бек къууанабыз. Сау болсунла, тышындан келиб бизге болушханла да», - деди институтну окъуу джанындан проректору Семенланы Марьям.
Андан сора, Абу-Ханифа имамны атын джюрютген республикан Ислам институтну ректору Ёзденланы Расул сёлешди.
«Бостанланы Исмаил хаджи ишлеб тургъанча этген бек къыйынды. Биз ол заманда этилген муратланы джашаугъа кийире, алгъа таукел барыргъа кюрешебиз. Билим бериуню дараджасын ёсдюре, джангы мадарла бла, амалла бла хайырланабыз. Адамланы динни, араб тилни тамалына юрете, студентлени хазырлаугъа терен эс бёлебиз. Анга шагъатды бизни студентлерибизни Бютеуэресей дараджада бардырылгъан эришиуледе алчы орунланы алгъанлары. Бизни ишибиз адамдан кесин бютеулей Аллахха къуллукъ этиуге беририн излейди. Аллахха къуллукъ этиу усталыкъ тюлдю. Ол къан бла келген сейир затды», - деди ректор Ёзден улу.
Ислам илмуну, маданиятны, окъууну джакълагъан фонд институтха болушлукъ табдыргъанлай турады.
Джыйылыуну аягъында окъуу учреждениени къуллукъчуларын медалла бла саугъаладыла. Институтну библиотекасына регионну дин башчылары иги, ариу халили, тюз иннетли, алгъан билимлерин башхалагъа джайгъан адамла хазырлауда болушлукъгъа деб, джангы китабла да бердиле.
УЗЕИРЛАНЫ Хусей.
