Халкъыбызны Джуртуна къайтарыр ючюн, озгъан ёмюрню 50-чи джылларында этилген кюреш джаш тёлюню, студентлени джыйылыуларындан, аланы кърал башчылагъа джазгъан письмоларындан башланнганды. Тири адамларыбыз джамагъатны арасында ангылатыу ишни таукел бардыргъандыла. Алай эте келиб, 1956-чы джыл хычаман айны 13-де Фрунзе шахарны къатындагъы Воронцовка деген элде танг кесек къарачайлы джыйылыу къурагъан эди. Анда Правительствогъа къарачай халкъны джуртуна къайтарлыгъын тилей барлыкъ келечилени джиберирге деб оноу этилген эди. Алай бла Москвагъа барлыкъ делегация хазыр болгъан эди: Акъбайланы Магомет, Алийланы Ракай, Къараланы Басханукъ, Токаланы Сеит-Умар, Эбзеланы Аскер.


Бюгюннгю кёз бла къараб, бир къауумла, биринчи делегация муратына джеталмай къайтхан эди, деб сёлеширге ёчдюле. Ол тюз тюлдю. Биринчи делегация экинчиге джол ачханын унутмазгъа керекди. Экинчи делегация, ол башлам бла кёллениб, кюрешни джангы кюч бла къолгъа алгъан эди. Салыб барыб Н.С. Хрущёвну кеси бла бетден бетге тюбешиб къайтханды. Ол делегацияны къурамында ма бу адамла болгъандыла: Байрамукъланы Абу-Юсюб,  Джаммаланы  Мурат, Байрамкъулланы Ибрахим, Орусланы Умар, Гюрджюланы Таубий, Чагъарланы Ибрахим, 88-джыллыкъ къарт, Гюрджюланы Нузула, Гаджаланы  Маджир.
Биринчи, экинчи келечиле да Къарачайны дагъанларыдыла, джигитлеридиле!

 
{jcomments}