Бу проект Къарачай-Черкесияда арт кёзюуде къызыу джюрюш алгъанды. Бизни республика джамагъатны сабий садла бла байламлы излемлерин баджарыуда бюгюнлюкде алчы регионланы бирине саналады. 2012-чи джылдан бери бютеулей да мында 49 аллай учреждение ишленнгенди, аланы бир талайына деменгили реконструкция этилгенди. Аны бла бирге «школа+детский сад» деген формат бла ишленнген школлада эмда сабий садлада школгъа хазырлагъан къошакъ къауумла ачылгъандыла. Алада бютеулей да 6 минг бла 837 сабийге орун ачылгъанды.
- Къуру ётген джылны ичинде бизде сабийлени школгъа хазырлагъан 7 организация хайырланыугъа берилгенди. Алагъа 926 сабий джюрюйдю. Бусагъатда энтда аллай тёрт учреждениеге реконструкция этиле турады. Ала да 50 чакълы бир сабийни сыйындырлыкъдыла. Бу тукъум мадарла сабий садлагъа кёзюу сакълау бла байламлы джарсыуланы тюбелек къоратыргъа мадар бергенди, алай бла джыллары 3-ден 7-ге дери сабийлени школгъа дери юретиу 100 процентге баджарылгъанды, - дейди «Детские сады - детям» деген проектни регионал координатору, КъЧР-ни Халкъ Джыйылыууну (Парламентини) депутаты Эбзеланы Ахмат.
Ол айтыугъа кёре, бу проектни «Бирикген Россия» партияны Баш Советини члени, КъЧР-ни Башчысы Темрезланы Рашид таймаздан контролда тутады. Аны бла бирге джамагъатны иш бла баджарыугъа да себеблик этеди. Сёз ючюн, арт джыллада ол проектни юсю бла 1 минг бла 500 иш орун ачылгъанын да чертгенди ол.
РФ-ны Президентини май указларына кёре «Бирикген Россия» партияны «Детские сады - детям» деген проектини кючю бла бютеу къралда 1 миллиондан аслам сабийге школгъа деричи учреждениелеге джол ачылгъанды. Ол хапар «Детские сады - детям» деген проектни координатору, Кърал Думаны билим бериуню эмда илмуну хакъындан комитетини председателни заместители Лариса Тутованы ауузундан чыкъгъан хапарды.
- Бютеу къралда арт джыллада 5 мингден артыкъ сабий сад ишленнгенди эмда реконструкция этилиннгенди, алагъа тыйыншлы оборудование салыннганды. Ол заманны ичине 7 мингден аслам мероприятие бардырылгъанды. Аллай сабий учреждениелени ишчилерини айлыкъларына, алада сабийлени ашларына-сууларына, юретиуню дараджасына мониторинг этиу ол джумушланы тизиминдеди. Школгъа дери сабий учреждениелени инфраструктураларын айнытыугъа да уллу эс бёлюнеди. Бу санагъатны ёсюмюне джораланыб кёб тюрлю конференция, форум, конкурс эмда бирси ишле бардырыладыла, - дейди Лариса Тутова.
Аны кибик бу партия проектни аллында джангы борчланы юсюнден да сёлешгенди ол. Сёз ючюн, аллай борчланы бириди джыллары 3-ге дери сабийлени яслиле бла баджарыу. Адамла джашагъан фатарлада, вузлада эмда предприятиеледе къуралгъан «семейные дошкольные группы» деген къауумланы кёбейтиу, ол ишге тыйыншлы болум къурау эмда бирси борчланы толтуруу, ол проектде сагъынылгъан федерал партия проектни къошакъ мадарларыдыла.
Бу проект 2017-чи джылдан 2022-чи джылгъа дери созуллукъду. Башха ашхы ишлени юсюне да «юретиучю» («воспитатель») деген усталыкъны статусун кёлтюрюрге да себеб болады ол.
Ёзденланы Якъуб.
