ДЖЫЛАН ЭМИЗИК, ЧАБДАР (КЛЕВЕР ПОЛЗУЧИЙ)
Кёбджыллыкъ, мийиклиги 40 сантиметрге джетген хансды. Саптагъайыны джерге джетген джери тамыр иеди. Чапыракълары кёзюулю битедиле, джукъаладыла, бутакъчыкълары тюз башларында ючюшер чапыракълы боладыла. Чапыракълары мутхузуракъ джашилдиле. Гоккалары ууакъ акъсылдым неда къызылыракъ бетлидиле, бирге джоппу джайылыб, тобха ушашдыла. Кеслери да гюл саптагъайны тюз башында, чапыракъладан иги мийикге ёседиле.
Урлугъу тюз къудоруду, кеси да хар гюл джоппуда 3-4 болады. Бютеу да джай айлада чагъыб турады. Джылан эмизик джайлыкълада, тюз атылыб къалгъан джерледе, юй тёгерекледе, мал аягъы джюрюген джерледе битеди.
Ёпке аурууу, не тюрлю да сууугъу болгъан, тиширыу аурууу болгъан бу халда, бир мардада хайырландырыргъа керекди: бютеу да хансны, ууакъланыб, джыйылыб тургъанындан уллу шай къашыкъ бла бирни 200 миллиграмм къайнагъан суугъа атыб, бир сагъатны шайча этиб, башын джабыб туруб, андан сора 50 миллиграммдан ашаргъа 20 такъыйкъа къалыб кюнюне юч кере ичигиз. Тюз шай халда иссилей да ичигиз. Джел ауруудан инджилгенлеге себеб боллукъду, адамгъа къарыу да береди.
{jcomments}
