Бирджыллыкъ, мийиклиги 50-70 сантиметр болгъан хансды. Тюб тамыры урчукъчады, тюз энгишге барады. Саптагъайы кёб бутакълыды, чапыракълары къысха сабчыкълада экишер битедиле. Аланы узунлукълары 3-5, кенгликлери 1,5-2 сантиметрдиле. Гоккалары, чапыракъ бутакъланы къыйырларында, гокка саптагъайны башында битедиле. Ала биришердиле, ууакъдыла. Биришер сары бетли, гокка чапыракъчыкълары боладыла. Саптагъайны да, бутакъларыны тышлары да ууакъ къалын тюклюдюле, урлугъу беш бюрчеклиди. Кеси да апрель-май айлада чагъады. Ол сууукъла тюшгюнчю чагъыб турады.

Джулдузлу чыгъана тюз джерледе, талалада, сыртлада, ёзен суу джагъалада, къумлу джерледе, сабанлыкълада, бачхалада, темир джол джанлада, джол джанлада ёседи. Бир-бирле кеслери салыб битдиредиле. Дарманнга хансын, артыкъсыз да чапыракъларын бютеулей джай айлада джыядыла. Хауа джюрюген салкъын джерде неда 40-50 градус джылыуу болгъан ыхтауда кебдириледи. Андан сора къургъакъ хауалы мекямда сакъланса, беш джылны дарманлыгъын тас этмейди.
Джулдузлу чыгъана хансны къан тамырланы ичлеринде туз гыртчыкъла орунлу болсала, адам иги сиялмаса, ашхынны сууу джетишмесе, ичегиле иги ишлемеселе, къан иги джюрюмесе ичиредиле. Къан басымны чёкдюрюрге да, къаны уюгъаннга да джарайды.