Къобанланы Борис бла Джубуланы Софьяны къызлары Алийланы Мадина Джангы Джёгетей элни орта школун 1996-чы джыл джетишимли бошагъанды. Гитчелигинден нюзюр этиб тургъаныча медицина къуллукъчу болургъа талпыб, Черкесскеде медицина колледжге киреди. Аны да 2000-чи джыл джетишимли тауусуб, акушер усталыкъ алыб чыгъады. Алай бла умуту тола баргъан Мадина 2001-чи джыл Джёгетей Аягъы районну ара больницасыны терапия бёлюмюне, медсестра болуб, ишлерге джарашады.
Ол джыл огъуна Алийланы Руслан бла джазыуун байлайды. Аланы юч сабийлери барды. Алайды да, насыблы ана сабийлерине къараргъа да, сюйген ишин, бёлюнмегенлей, айыбсыз баджарыргъа да джетише, ишлеб тургъанлы, 19 джылдан артыкъ болады.
«Мен кесими бек насыблы тиширыугъа санайма, - дейди Мадина. - Юйюмде юч саулукълу сабий ёседиле. Заманымы сюйген ишиме бериб ётдюреме. Ишлеген коллективим да огъурлу, болумлу адамладан къуралгъанды. Алагъа тамадалыкъ этген врач а республикада аты иги бла айтылгъан, къралыбызны уллу шахарыны биринде ишлеб, уллу иш сынам алыб къайтхан Айдарукъланы Халисни къызы Ларисады. Коллективге да таб оноу эте билген, болумлу, билимли врачды. Аны юсюне да къартлагъа, ауруу бек джарсытыб инджитгенлеге да ариу сёзю, дарманча, джарагъан адамды. Мени сартын, быллай тамада бла, ол тамадалыкъ этген адамла бла бирге ишлерге чёб тюшгенине бек къууанама».
СОЗАРУКЪЛАНЫ Норий.
{jcomments}
