Исхакъланы Алийни джашы Амыр халкъыбызны белгили кардиологларыны бири эди.
Ол тутхан ишин джиг-джигине дери билиб, толусу бла этмей къоймагъанды. Таныгъанла, билгенле, аны къолунда саулукъларын бакъгъанла бюгюн-бюгече да аны унутмай, бюсюреу этгенлей турадыла. Ауушханды, джандетли болсун.
Амыр 1942-чи джыл Хасаут элде туугъанды. Красный Курган элде орта школну бошагъанды. Андан сора Терк Башы Тегейде Орджоникидзеде медицина институтну тауусуб, адамланы бакъгъан усталыкъ алгъанды. Аны ызындан 1968-чи джыл Ставрополдагъы медицина клиника ординатурагъа кириб, усталыгъыны юсю бла билимин ёсдюргенди. Джаш врач Зеленчук район больницада врач-ординатор болуб ишлеб тургъанды. Андан сора 2016-чы джылгъа дери Ставрополь шахарда 3-чю номерли шахар клиника больницаны инфаркт бёлюмюню тамадасы къуллукъну толтургъанды. Урунууну ветераны эди.
Белгили врачха джюреклери ауругъанла бютеу Шимал Кавказдан, Эресейни башха джерлеринден да джюрюгендиле. Къарачайдан да анга барыб джюзле бла адамла саулукъларына къаратхандыла.
Ол ауругъанлагъа тюз, терк диагноз салыб, джюрек тамырланы аурууларын бакъгъанды. Кеси профилактика мадарла, амалла къураб, ауругъанны саулугъун къайтаргъан ишле бардыргъанды. Адамланы къан басымлары кёлтюрюлсе, аны тюзетген ишле къурагъанды. Джюрек тамырлары хылеу, къарыусуз болгъанланы, джюреклери тохтаб-тохтаб неда бек къызыу ургъанланы, джюрек тамырларыны къабыргъалары джукъа болуб, ала джарылыргъа джетиб тургъанланы, ауур джётел этгенлени, къыйналыб солугъанланы багъыб, джюрек къан тамырлагъа къанны бирча бериб турурча этиб бек кёб адамны къууандыргъанды.
Аны усталыгъы мийик дараджада болгъанды. Билимин, кючюн бир адамдан да аямагъанды. Джумушакъ тилде сёлешиб хар ауругъанны джюрегине энчи джол табханды. Адамлагъа джюрек джылыуун бере, ышарыб сёлешгенди. Къыйын ауругъанны ауруун сындырыб иги боллугъуна ышандыргъанды. Аны таныгъанла аллай врачла аз тюбейдиле, дейдиле.
Амыр «РСФСР-ни саулукъ сакълаууну айырмасы», «Эресей Федерацияны махтаулу врачы» деген сыйлы атланы джюрютгенди. Ата джуртну аллында «Уруунуда махтаулу ишлери ючюн» деген орденни медалы бла, иги доктор, саулукъ сакълауну элитасы, Ата Джуртну аллында къыйыны ючюн деген II-чи дараджалы медалла бла саугъаланнганды. Исхакъ улуну, башха кърал саугъалары, Хурмет грамоталары, Бюсюреу къагъытлары да бусагъатда сабийлеринде сакъланадыла.
Амыр юй бийчеси Борлакъланы Къылыч-Герийни къызы Джаварьят бла эки къыз ёсдюргендиле. Зухра врач-кардиологду. Ол да атасыны джолу бла бара Ставрополда 3-чю номерли шахар клиника больницада ишлейди. Индира уа врач-невропатолог къуллугъун Москва шахарда бардырады. Ала да тутхан ишлеринде адамладан бюсюреу табадыла.
ЛЕПШОКЪЛАНЫ Хусеин.
