Багъалы редакция!
Озгъан ёмюрню 80-чы джылларындан бери айланыб къарагъанда, белгили джазыучуларыбыз Байрамукъланы Халимат, Хубийланы Осман, Семенланы Азрет, Сюуюнчланы Азамат, Къагъыйланы Назифа, Батчаланы Мусса, Къобанланы Ахмат, Чотчаланы Магомет, Кёбекланы Билял, Лайпанланы Сеит, Биджиланы Идрис, Джаубаланы Хусей, Тюрклюланы Альберт, Созарукъланы Юсуф дагъыда башхала дуниядан кетдиле. Аллах рахмат этсин барысын да.
Аллахды билген, энди, ана тилибизде джазгъанла бек таркъайгъан болурла. Бюгюнлюкде РФ-ны Джазыучуларыны союзуну члени болгъан ненча къарачайлы барды? Мадар бар эсе, аланы атларын тукъумларын газетни бетинде басмаласагъыз деб, тилекчиме. Ана тилде джазгъанла алкъын бир бёлек бар эселе, Аллах айтса, тилибиз эриб кетмез эди деб, къайгъырыб джазгъанлыгъымды.
Аджиланы Хасан.
Хурметли Аджиланы Хасан!
Ана тилибизге къайгъыргъаныгъыз ючюн бек сау болугъуз! Аллахха шукур, ана тилде джазгъанла алкъын таркъаймагъандыла. Алагъа къууанабыз. Бизни бек учундургъан а, джаш тёлюбюздю. Сёз ючюн, Байрамкъулланы Науруз 1993-чю джыл, Байчораланы Шамил 1991-чи джыл, Ёзденланы Шамил 1990-чы джыл туугъандыла. Аланы ана тилде бёлек китаблары да чыкъгъандыла. Москвада быйыл дуния джарыгъын кёрген «Современная литература народов России ПОЭЗИЯ антология» деген китабда, бу юч джаш адамны, къарачай тилде да, орусчагъа кёчюрюлюб да бёлек назмулары басмаланнгандыла.
Ёзденланы Шамил 2008-чи джыл, 18 джылы тола Россияны Джазыучуларыны союзуна член болгъан эди. Ол заманда саулай Россияда Ёзден улу джылы бла эм джаш профессионал джазыучу эди.
Байрамкъулланы Науруз 2012-чи джыл, 19 джылы тола Россияны Джазыучуларыны союзуна член болду. Ол да халкъыбызгъа бек уллу сый эди.
Аллах айтса, къысха заманны ичинде фахмулу джашыбыз Байчораланы Шамил да Союзгъа кирир деб бек ышанабыз. Аллахха шукур, джазыучуларыбыз бардыла. Болгъанны къой, аланы бир къауумуну чыгъармалары бек мийик дараджагъа джетгенлерине, керти ангылагъан адамла уллу багъа бередиле. Алайды да, къошмай, къоратмай айтсакъ, бюгюнлюкде джазыучуларыбызда Кърал саугъагъа, Нобель саугъагъа тыйыншлыла да бардыла, дерге боллукъду. Аллах окъуучуларыбызны кёб этсин деб, барыбыз да аны тилейик.
Энди, Хасан, сизни тилегигизни къабыл эте, бизни миллетден СССР-ни эмда РФ-ны джазыучуларыны союзларыны бюгюнлюкде сау-эсен болгъан членлерини тукъумларын, атларын, аталарыны атларын басмалайыкъ.
1. Акъбайланы Азрет, Алийни джашы
2. Акъбайланы Харун, Мудалифни джашы
3. Аппаланы Билял, Добайны джашы
4. Багъатырланы Шахриза, Алийни къызы
5. Байрамукъланы Фатима, Ибрахимни къызы
6. Байрамкъулланы Науруз, Илиясны джашы
7. Бачаланы Алий Мурат, Хасанны джашы
8. Батчаланы Альберт, Муссаны джашы
9. Батчаланы Башир, Османны джашы
10. Байчораланы Сослан, Якъубну джашы
11. Бостанланы Умар-Алий, Аубекирни джашы
12. Гапполаны Аминат, Исмаилны къызы
13. Доюнланы Абдурахман, Муссаны джашы
14. Джазаланы Балуа, Юсуфну джашы
15. Ёзденланы Альберт, Магометни джашы
16. Ёзденланы Борис, Ибрахимни джашы
17. Ёзденланы Ирина, Шарафатдинни къызы
18. Ёзденланы Рашид, Русланны джашы
19. Ёзденланы Сапар, Муссаны джашы
20. Ёзденланы Шамил, Альбертни джашы
21. Ижаланы Умар, Халинни джашы
22. Какушланы Хусей, Аскербийни джашы
23. Кечерукъланы Байдымат, Сеит-Мазанны къызы
24. Къобанланы Махмут, Муссаны джашы
25. Къоркъмазланы Аскер, Хызырны джашы
26. Лайпанланы Билал, Апасны джашы
27. Лепшокъланы Хусеин, Узеирни джашы
28. Мамчуланы Дина, Тариэлни къызы
29. Салпагъарланы Кулина, Абулкеримни къызы
30. Тохчукъланы Исмаил, Магометни джашы
31. Тотуркъулланы Къазий-Магомет, Назбийни джашы
32. Хапчаланы Салых, Юсуфну джашы
33. Хубийланы Назир, Ахияны джашы
34. Шаманланы Медиха, Хызырны къызы.
Джууаб джазгъан, басмагъа хазырлагъан
Джазаланы Лида.
