Адамны джашауунда китабны уллу магъанасы барды. Школ окъуучула, устазла, алимле, башхала да аны окъугъанлай турадыла. Билимлерин ёсдюрюрге излегенлеге ол уллу насыбды. Кёб тюрлю литератураны китаб сатхан тюкенледе, библиотекада табаргъа боллукъду. Иги, фахмулу, терен магъаналы джазылгъан китабла гитчеге, уллугъа да хайырлыдыла. Къарачай-Черкес кърал университетни илму библиотекасы республикада эм онглуланы бириди.

Аны директору Къаракетланы Фатимады. Таулу къыз Къарачай шахарда туугъанды. Школну бошагъандан сора маданиятны Краснодардагъы институтун тауусханды. Партияны шахар библиотекасында ишлеб тургъанды. Ол 1986-чы джыл КъЧКъУ-ну библиотекасында, алгъы бурун бёлюмню тамадасы, арадан заман озуб директорну орунбасары болуб ишлейди. Тыйыншлы билими болгъан джаш уста тутхан ишин юлгюлю толтурады. Устазланы, студентлени арасында сый табады. Фатиманы 1993-чю джыл илму библиотеканы директору этиб саладыла. Ол, заманны излемине кёре ишин таб къурай, кёб ашхы тюрлениу этеди.

Ол кийирген бирлешген окъуу, инвентарсыз тергеу системаланы, окъуу процессни китаб бла баджарылыуун эсебленнген картотеканы, производство процесслени: окъуу литератураны къурауда, фондну, окъуучуланы тергеуде уллу магъанасы барды. Система бла салыннган каталогну ББК-гъа кёчюрюрге, алфавит-предмет указателлени къураргъа Фатима кёб къыйын салгъанды. Бюгюнлюкде библиотека шахарда, республикада да алчыды.

Библиотеканы къурамына окъуу-илму, социал-педагогика, суратлау абонемент киредиле. Студентлеге, илму къуллукъчулагъа окъуу залла бардыла. Методика-библиография джыйышдыргъан, литератураны илму джаны бла хазырлагъан бёлюмле, кафедралы 26 библиотека ишлейдиле. Библиотеканы фондунда уллу магъанасы болгъан, аз тюбеген китабла кёбдюле. КъЧКъУ-ну алимлерини, Шимал Кавказны баш окъуу заведениелерини акъыл, илму ишлери сакъланадыла.

Студентле, башхала билимлерин, маданиятларын ёсдюрюб, ариу, тюз халили болуб, джашауда тыйыншлы орун алыр, халкъларыны, къралны атларын мийик дараджада айтдырыр ючюн, библиотеканы директору Фатима кёб тюрлю иш этеди, кючюн къарыуун аямай кюрешеди.

Библиотека студентлеге, аланы излемлерине амалсыз керекли хазнады. Мында китаб кёрмючле, тематика ингирле, ушакъла, литература къараула бардыргъанлай турадыла. Библиотеканы фонду да ёсе барады. Аны бла 5 мингден артыкъ студент, устаз, алим хайырланады. Джыл сайын 389 минг китаб бла журнал окъургъа бериледи. Студентле, башхала бир минг библиография справка, консультация аладыла.

Библиотеканы фондуна джыл сайын 6 минг басма зат къошулады, аны электрон картотекасы да барды.

Библиотеканы тарихинде энчи орунну адамла алгъанлары хакъды. Ала аны махтауудула. Профессионал ишчиле аны тарихинде энчи ыз къоядыла. Къаракетланы Фатима да ашхы коллективи бла аланы бириди.

ЛЕПШОКЪЛАНЫ Хусеин.