Белгили ногъай джазыучу, джамагъат къуллукъчу Казаков Валерий Сеперовичге 70 джыл толду.  

Ол юбилей бла байламлы республиканы филармониясына джууаблы къуллукъчула, джазыучула, актёрла, эллени, шахарланы келечилери, хоншу регионладан адамла келген эдиле.
Республиканы культура министри Бороков Рамазан, сахнагъа биринчи чыгъыб, юбиляргъа КъЧР-ни Правительствосуну Председатели Озов Асланны алгъышлау къагъытын берди. Ногъай районну къадысы Байдаров Темирбек хаджи, Казаков Валерий Адиль-Халкъ бла Эркин-Халкъны советлерини тамадасы болуб ишлеген джылларында диннге уллу магъана бергенин, болушханын черте, Шимал Кавказны Муслиманларыны координацион советини председатели Бердиланы Исмаил хаджини атындан «Умманы аллында махтаулу ишлери ючюн» орден бла саугъалады.
Андан сора РФ-ны Президентини Шимал Кавказ федерал округунда баш федерал инспектору Игорь Дральщиков, КъЧР-ни миллет ишлерини, кёбчюлюк коммуникацияла бла басманы юсюнден министри Хапиштов Мурат, Дагъыстанда Ногъай районну культура бёлюмюню тамадасы Кудайбердиев Яхья, республиканы Парламентини депутаты Михайлович Муратхан, Ногъай районну администрациясыны  тамадасы Керейтов Энвер, Къарачай-Черкесияны кърал театрларыны директорлары, республикан газетлени редакторлары, джазыучула алгъышладыла, творчество джетишимле, саулукъ, насыб теджедиле.
Филология илмуланы доктору Суюнова Насипхан джыйылгъанланы джазыучуну джашау джолу, чыгъармачылыкъ ишде джетишимлери бла шагъырей этди. Эки проектни айырыб чертди.
- Казаков Валерий башчылыкъ этген «Ногъай Эл» деген миллет культура джамагъат организация 2014-чю джылдан бери ишлеб тургъан «Ногайцы: XXI век. История. Язык. Культура. От истоков к грядущему» деген халкъла арасы илму-практика конференцияны къураргъа бек болушханды. Ол конференцияны материаллары эки уллу китаб болуб да чыкъгъандыла. Экинчи проект ногъай-орус сёзлюкню юсюнденди. Кёб джылланы узагъына бизни алимле кюрешген илму ишге Россияны Президентини грантын алыргъа онг берген да бу фахмулу адам бла «Ногъай Эл» болгъандыла. Уллу китаб чыгъарыкъды. Ол 40 минг сёзден къуралгъанды. Бу игиликлери эмда терен магъаналы суратлау китаблары ючюн да бизни алимлени атларындан бюсюреу этеме, - деди Насипхан.
Джыйылыуну аягъында юбиляр алайгъа келгенлеге джюрек разылыгъын билдирди.
 
(БИЗНИ КОРР.).
 
{jcomments}