Байрамукъланы Халимат сау заманында Къарачай-Черкес Республиканы Кърал миллет библиотекасында кёб болуучан эди. Анда ол тюрлю-тюрлю творчество тюбешиуле, поэзияны, прозаны ингирлерин бардыра эди, творчество интеллигенция бла тюбеше эди. Адамлагъа джангы назмуларын, повестлеринден, романларындан юзюклерин окъуй эди. Дуния, совет литературадан сейир хапарла айта эди. Джамагъат да анга тынгыларгъа сюйюб келе эди.
Августну 15-де Халиматны атын джюрютген республикан Кърал библиотека, аны 100-джыллыгъын белгилеб, бу джарыкълыкъ учреждениеде бюстун да ачханды.

Ол эсгертмеде Байрамукъланы Башчыны къызы Халиматны СССР-ни Джазыучуларыны бирлешлигини члени, Къарачай-Черкес Республиканы халкъ джазыучусу болгъаны джазылгъанды. Ол, уллу джазыучуча, прозада, поэзияда, драматургияда да джукъланмазлыкъ ызын къалдыргъанды. Аны себебли аты ёмюрлюкге махтау бла айтылгъанлай турлукъду.
Ол кюн, республикан властланы, джамагъат, миллет, илму, творчество  организацияланы келечилери, Байрамукъланы тукъумну белгили адамлары келиб, эсгертмени ачарны аллы бла Халимат Башчыевнаны джашаууну, джазыучулукъ ишини юслеринден кёб джылы эмда махтау сёз айтылды. Анга уллу поэтге, прозаикге, драматурггача багъа берилди.
Байрамукъланы тукъумну башчысы Байрамукъланы Умар-Алий айтхандан, Къарачай-Черкес Кърал библиотекада Байрамукъланы Халиматха ачылгъан бюст уллу джазыучуну 100-джыллыгъына аталыб тукъумну башламчылыгъы бла аны ачхасына этилгенди эмда салыннганды. Аны мийиклиги эки метр бла джарым чакълы бирди. Эсгертмени кесин да Къарачай-Черкес Республиканы, аны кибик Дагъыстан Республиканы махтаулу суратчысы эмда скульптору Зарманбетов Кошали этгенди.
Къууанчха келгенле Халимат Башчыевнаны уллу джазыучу болгъанын айтхан бла бирге кенг джюрекли ачыкъ адам болгъанын да чертдиле.
 - Мени анам, аламат джазыучу болгъаны бла да къалмай, къонакъ сюйген адам эди да, бизни юйюбюз бир заманда да адамсыз болмай эди, - деб эсге тюшюрдю Халиматны джашы Токъланы Эдуард, ол кюн алайда сёлеше. – Къууанчы болгъан да, тарыгъыуу болгъан да бизге келе эди. Анам аланы къайсы бирине да джылы тюбей эди. Айтханларына эс бёлюб да тынгылай эди. Болушлукъ кереклиге болушхан да эте эди.
Байрамукъланы Халимат 14 поэзия китаб, 4 роман, 5 повесть, 4 публицист китаб, 1 опера, 1 музыка комедия, кёб тюрлю хапар джазгъанды да, ала дунияны 50 халкъыны тилинде басмаланнгандыла.
Джазыучулукъ ишде уллу джетишимлери ючюн Халимат Башчыевна «Хурмет Белгисини», «Халкъланы Шохлукъларыны» орденлери эмда «Махтаулу урунууу ючюн» деген медаль бла саугъаланнганды. 
Къарачай-Черкес Республиканы Кърал миллет библиотекасы 2000-чи джылдан бери Байрамукъланы Халиматны атын джюрютеди. Джыл сайын августну 15-де аны туугъан кюнюн къууанч халда белгилейди.
Уллу поэтессаны бюсту да августну 15-де ачылды. Энди ол бу джарыкълыкъ учреждениени фойесин джасагъанлай турлукъду.

Хубийланы Абу-Хасан.