Мындан алда Черкесскени сурат галереясында «Традиции и современность» деген ат бла уллу суратлау кёрмюч ачылды.

Ол Эресейни Суратчыларыны чыгъармачылыкъ союзуну 100-джыллыгъына,  Къарачай-Черкес кърал университетни 80-джыллыгъына аталгъан эди.

«Суратланы тюрлю-тюрлю адамла кеслерини фахмуларына кёре этселе да, аланы бирикдирген Ата джуртха сюймекликлериди. Школ сабийледен башлаб белгили устазлагъа дери адамла суратларын бери салыргъа мадар табхандыла. Джыйылгъанла алагъа терен эс ийиб, къууаныб къарайдыла. Мында Москваны, Санкт-Петербургну, Ставрополну школ сохталарыны суратлары да бардыла. Мени сейирсиндирген былайыны джамагъатыды. Ала къонакъны бек сюйген, кимге да игилик излеген адамладыла», - деди Эресейни Суратчыларыны союзуну президенти Константин Худяков.

Бизни суратчыларыбызны асламысы Къарачай-Черкес кърал университетни бошагъанладыла, кёрмюч университетни 80-джыллыгъына да аны ючюн аталгъанды. Сурат галереяда кёрмюч бошалгъандан сора ол суратла университетни къабыргъаларын джасарыкъдыла.

Эресейни Суратчыларыны союзуну члени, Къарачай-Черкес кърал университетни устазы Наталья Кириченко айтхандан, кёрмючню джасагъан кёб тюрлю темагъа аталгъан суратла къарагъан адамланы патриотизмге, Ата джуртну сюерге чакъырадыла.

«Мен кёрмючде Къарачай-Черкесияны халкъларыны миллет шартларыны кёблюгюн, аланы ариулукъларын бек джаратдым. Мен кёрмючге «Софийский ледник» деген бир суратымы салгъанма. Бу суратым Бютеуэресей кёрмючледе да болгъанды. Мен аны кюнню джарыгъы ауушунуб баргъан къачхы кюнлени биринде этгенме. Ол кюн, бир сейир тауну туурасында, къайын тереклени къалай джарыгъанларын кёрюб, ол сейирлик халны адамлагъа кёргюзтюрге излегенме», - деди Наталья Кириченко.

Лепшокъланы Хусеин.