Хубийланы Исхакъны джашы Вениамин озгъан джылны ахыр кюнлеринде 70-джыллыкъ юбилейин белгилеген эди. Хубий улу джазыучуду, журналистди, сурат салыучуду, скульпторду, устазды. Нени да билген, неге да къолу джарашхан, фахмулу адамды.
Кёчгюнчюлюкде 1948-чи джыл, Къыбыла Къазахстанны Темирлан элинде туугъанды. Джуртубузгъа къайтхандан сора Морх элде школну, Къарачай шахарда да устазла хазырлагъан институтну сурат салгъан бёлюмюн тауусханды. Урунуу джолун шахарда суратлау школну устазы болуб башлайды. Узаймай аны директор къуллукъгъа саладыла. Алайдан Джарыкълыкъ юйге директор этиб кёчюргендиле, шахарны баш суратчысы къуллукъну да анга бередиле. Джарыкълыкъ юйде «Алания» деген тепсеу-джырлау ансамблни суратлау джаны бла башчысы, солисти да болуб турады. Талай джылдан 5-чи школда къуралгъан интернатха тамада этедиле, кёб турмай школну директору болады. Андан сора да джууаблы къуллукълада ишлейди.
Аллах берген фахмусуна институтда алгъан билими да дагъан болуб, адамланы, табигъатны суратларын къагъытха, сослан ташха тюшюрюб, эсгертмеле сюеб турады. Аны къол ызларын Къарачай район бла шахардан башха джерледе да кёрюрге боллукъду. Бизни, джазыучуланы, китабларын суратла бла джарашдырыуда да уллу къыйыны барды.
Хубий улу студент джылларындан бери назмула, къара сёз бла да джазады. Талай китабы басмаланнганды. Аладан да айырыб «Гоппан» бла «Нюзюр» деген чыгъармалары окъуучуланы китаб тапхаларында сыйлы орунну алыб турадыла.
Мындан алда Къарачай шахарда 6-чы орта школда, аны юбилейине аталыб къууанч джыйылыу болду.
Анда поэзияны сюйгенлеге деб къуралгъан «Литературная гостиная» барды. Анга Дотдайланы Люаза башчылыкъ этеди. Ол, тюбешиуню ача, Хубийланы Вениаминни джашаууну, санат ишини юсюнден къысха хапар айтды. Андан сора РФ-ны Джазыучуларыны союзуну члени Доюнланы Адрахман, тарих илмуланы доктору Къойчуланы Аскербий, университетни сурат салыу факультетини устазы Джуртубайланы Хасан, Чотчаланы тукъумну тамадасы Абугалий сёлешиб, маданиятыбызгъа къошхан юлюшю ючюн Вениаминнге разылыкъларын билдире, мындан ары да творчество джетишимле теджедиле. Школну сохталары Хубий улуну назмуларын азбар айтыб, джыйылгъанлагъа эшитдирдиле.
Былайда энтда биз къошарыкъ: Хубий улу ана тилибизде чыкъгъан газет бла шохлукъ джюрютгенли 40 джыл болады. Аны джаш тёлюге билим бериу бла ариу халили этиб ёсдюрюуге, дунияда бола тургъан сейир затлагъа аталгъан статьялары, юлгюлю адамланы юслеринден очерклери, назмулары, хапарлары газетде чыкъгъанлай турадыла. Адамла аланы сюйюб окъугъанларын айтадыла. Алайды да, Хубийланы Вениаминни мындан ары да редакция бла байламлылыкъ тутарына ышаннганыбызны билдире, юбилейи бла алгъышлайбыз, саулукъ-эсенлик, уллу насыб теджейбиз. Аны бла бирге аны юч назмусун да басмалайбыз.
Аппаланы Билял.
Бары да багъалы
Ана, эгеч да, келин да, къыз да –
Бары да бизге багъалы.
Хар бирине да сюймеклик сакълаб,
Юзюлмей турад бир халы.
Ма ол халы уа къурчдан да кючлюд
Сюе билиучю ангыдан.
Джашауларына сингнгенден синге,
Сюе барабыз джангыдан.
Къайын анагъа, къайын атагъа
Келин къыз кибик кёрюне,
Сыйына кёре хар бири аны,
Иелле насыб тёрюне.
Хар ананы уа сыйы, сыры да
Кёчелле къызгъа, келиннге.
Алайд да, ашхы шартла джашайла,
Бой бермегенлей ёлюмге.
Ашхы шартла да кёче баралла
Ата-анадан тёлюге.
Бизле борчлубуз, юлгюлю джашаб,
Сыйлы шартланы берирге.
Джашау тохтамай барыб турурлай,
Хар тёлю - джерге багъалы;
Хыны ёмюрле къарыу эталмай,
Юзюлмей турад ол халы...
Татлы тюш
Бюгече мени атам-анам да,
Экиси бирден, тюшюме келиб,
Тюз туурамдагъы тауну башында
Турдула, ариу ауазла бериб...
Эсимдедиле сабийлигимде
Къур’ан суурала окъугъанлары.
Тынгылай эдим, сабий сагъышла
Сабий башымдан кетиб бир джары.
Меннге багъалы ол эки ауаз,
Сабийлигиме элтдиле мени.
Чексиз багъалы ол ауазланы
Унуталмайма мен андан бери.
О, татлы тюшюм! Бошалыб къалма,
Сабийлигимден тансыкъ алайым,
Тюшюме кирген эки ауазны
Мен джюрегиме терен салайым.
Ачха
Кёб муратлагъа элтеди ачха.
Аны иги да, начас да джояд.
Бирлеге къууанч береледи ол,
Бир-бирлеге уа насыбны ояд.
Не кёб болса да ачханы саны,
Биреуленнге да болалмагъанды кёб.
Не къадар аслам джыйсанг да аны,
Айталлыкъмыса анга, кёбдю, деб?!
Ачханы джояр минг чурум да бар.
Джыялмагъан да джыялгъаннга - зар.
Ол ненчауланны эталгъанд тели!
Ненча джюрекни эталгъанды тар...
Адамлыкъгъа уа ачха тюлд ёлче.
Бард аны джерде бир сыйлы хаты:
Ашхылыкъ эте джашаб келгенни,
Кеси кетсе да, джашайды аты!
